Atualità
Cumpededa dla grupes linguistiches: da śën inant sun papier
Ai 2 de auril incà àl scumencià la segonda fasa dla cumpededa dla grupes de rujeneda dal titul „Tu contes“, cossa che n ie iusta tl lëur de fé. Do la cumpededa online vëniel śën cumpedà sun papier.
Ntëur a 30 percënt de chiche possa fé pea à pona efetivamënter nce dat ju si detlarazion online, tl tëmp danter dezëmber dl 2023 y fauré dl 2024. N merdi ai 2 de auril iel unì scumencià ti Chemuns de Südtirol cun la segonda fasa dla cumpededa. I Chemuns à nciarià cunlauradëures aposta che va da cësa a cësa. Chël uel dì che les/i ti dà a dutes/duc che ne à mo nia fat pea pra l zensimënt n formular aposta cun na cuverta che i jirà a tò te n segondo mumënt.
Mpue‘ sciche pra la cumpededa online tléchel fé la crëusc sun la grupa de rujeneda pra chëla che n se sënt de tuché o a chëla che n uel se agreghé. Dutes y duc sëura i 14 ani mët ala fin l formular te na busta blancia y la stluj. La detlarazion per mutans y mutons sot ai 14 ani vën fata dai respunsabli dl’educazion che la mët pona ite te na busta rosa. Nce chësta ie da stlù. Mpurtant iel dantaldut che n ne vede nia a scrì su inuemes sun l formular y sun la busta, propi per garantì che la relevazion reste anonima. La y i cunlauradëures de Chemun passa ala fin a se tò la bustes cun i formulares scric ora.
La y i cunlauradëures ie coche dit unii/ides nciariei/des dal Chemun ulach n sta. Scencajo possi nce se identifiché cun na tessera ufiziela aposta per chësta si ncëria. Ti ufizies de Chemun iel mesun giapé nfurmazions sëuraprò n con‘ dla cumpededa, danter l auter nce canche l vën scumencià avisa cun l zensimënt sun papier, sce n ne à nia bele scumencià ai 2 de auril. Te n valgun Chemuns, mé per dì a Bulsan danter i 2 y i 6 de auril, possa la cumpededa cun detlarazion de purtenienza ala grupa linguistica nce unì fata ti ufizies per l zitadin.
La cumpededa dla grupes de rujeneda, perauter urganiseda dal Istitut provinziel per Statistica ASTAT, fina via ai 30 de juni.
Nfurmazions genereles n con‘ dla cumpededa dla grupes de rujeneda y na lista cun la dumandes y respostes che ie states l plu suvënz (FAQ) iel oradechël da abiné sun la plata internet https://cumpededa-linguistica.provinzia.bz.it.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/ck/dl
