Atualità
25 de nuvëmber: l Südtirol se fërma
La Cumiscion per la valivanza dla chances danter ëiles y ëi y l Ufize per l’ëiles chërd sù la populazion a se fermé per doi menuc n sada da mesdi per mustré si solidarietà al’ëiles che patësc viulënza
Ai 25 de nuvëmber da mesdi (12:00) ie duta la provinzia cherdeda a se fermé per doi menuc per mëter deberieda n sëni contra la viulënza sun l’ëiles. A chësta azion chërd la Cumiscion per la valivanza dla chances danter ëiles y ëi y l Ufize per l’ëiles dla Provinzia. Sustenides vënieles dala Rë contra la viulënza sun l’ëiles y si families coche nce da na lingia de urganisazions y istituzions. Tlo leprò ie la Diozeja de Bulsan-Persenon, l Cumité provinziel dl Coni, l Cunsorz di Chemuns dla Provinzia, l “Südtiroler Jugendring”, la lia dla paures dl Südtirol, l muvimënt catolich dl’ëiles, la lia catolica per la families y l KVW ëiles. Ajache la viulënza sun l’ëiles ne ie nia na tematica che reverda me pueces: n media vëniel tla Talia mazà n’ëila uni trëi dis. Belau for ie chël che les maza l cumpani o uem o l ex-cumpani o uem o a uni moda n parënt maschil. Tl 2022 à bën 600 ëiles cris cunsëi y acumpaniamënt pra la cunsulënzes provinzieles per l’ëiles te situazions de viulënza, 130 ëiles y 122 mutons y mutans sot a 18 ani à giapà n sté te cuatieres metui a si despusizion.
"N l di internaziunel contra la viulënza sun l’ëiles ulons se fermé per doi menuc per dé n sëni deberieda. Ajache cun l chiet dijen suvënz deplù che cun mile paroles", tlarësc la Presidënta dla Cumiscion per la valivanza dla chances danter ëiles y ëi Ulrike Oberhammer. L’azion vën sustenida da na lingia de istituzions y chësc desmostra che la mpurtanza dla cuestion ie scialdi sentida. "La viulënza sun l’ëiles ie n reat che ne daussa nia plu unì azetà. Tla Talia vëniel belau uni trëi dis mazà n’ëila da si partner o ex-partner y tan che uni di muessa ëiles patì viulënza, unfat sce fisica, emoziunela o economica – chësc muessa nes tuché, l muessa mené a n mudamënt de pensier tla sozietà!", detlarea Oberhammer y spliega: "L ie per nëus stat de mpurtanza mëter a jì chësta azion pra chëla che duc y dutes, nce persones singules possa tò pert, ajache la viulënza ti n va a duta la jënt!"
Nce l Presidënt dla Provinzia Arno Kompatscher, che ie danter l auter de cumpetënza per l ciamp dla valivanza, sustën uni azion contra la viulënza sun l’ëiles: "La viulënza ne daussa nia unì azeteda. Perchël muessa la mesures de prevenzion dla viulënza vester na cuestion mpurtanta. Stravardé l’ëiles dala viulënza ie na ncëria mpurtanza de nosta sozietà. Y te chësc cuntest vala ënghe de superé la ravises cultureles dla viulënza psichica y fisica sun l’ëiles, la ududes, l’atribuzions y i cumpurtamënc stereotipics n cont di rodui dl’ëiles y di ëi."
A livel provinziel iel n 100 urganisazions, lies y istituzions, coche biblioteches y scoles, che partezipea al’azion cun si ideies y scumenciadives. Tl cheder dl’azion "Le Südtirol s’archita – Deboriada cuntra la violënza devers dles ëres" vën p.ej. la fiera Agrialp dala 12:00 fermeda per 2 menuc, ma nce la manifestazions sportives de chësta fin dl’ena vën fermedes per un n menut de chiet. Tl cheder dla mësses te dlieja meterà l muvimënt catolich dl’ëiles atenzion sun la tematica tres supliches. Tl zënter de Bulsan uniral furmà na ciadëina de persones che scota y ne se muev nia. Nce ti zëntri cumerziei sciche tl Twenty o pra duta la grupa Oberrauch vëniel cunedì l medemo messaje. Sun la plata web www.suedtirolstehtstill.bz.it giapëis deplù nfurmazions sun la tematica y sun duta l’azions y urganisazions che fej pea.
Tlo giapen aiut
Per ëiles che fej pea esperienzes de viulënza iel te nosta provinzia da giaté aiut pra i servijes dla 5 Cëses dl’ëiles a Bulsan, Maran, Burnech y Persenon. Iló giapa la vitimes de viulënza sustëni, cunsulënza y acumpaniamënt. Nce tla stazions de prim aiut ti spediei dla provinzia giapa la vitimes de viulënza aiut y sustëni te na luegia prutejeda canche les pronunziea la parola de codesc "Erika". D’autra mesures y prestazions tl raion dl sustëni ma nce dla prevenzion vën renfurzedes y ampliedes tres la lege provinziela sun la prevenzion dla viulënza y cun si aplicazion.
Chisc numeri vërc ie atifs di y nuet:
Cunsulënza per ëiles te situazions de viulënza y Cësa dl’ëiles a Bulsan: 800 276 433
Cunsulënza per ëiles te situazions de viulënza y Cësa dl’ëiles a Maran: 800 014 008
Cunsulënza per ëiles te situazions de viulënza y Cësa dl’ëiles a Persenon: 800 601 330
Da arjonjer tres telefon te chisc orars:
Cuatieres prutejei a Bulsan: 800 892 828 (da LU a VE dala 8:00 ala 12:30 y da LU a JU dala 13.30 ala 17.00
Consulënza per ëiles te situazions de viulënza y Cuatieres prutejei a Burnech: 800 310 303 (da LU a VE dala 8:30 ala12:00)
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/ck/red
