Atualità
Veles provinzieles 2023:L Presidënt dla Provinzia chërd ala veles
L Presidënt dla Provinzia ti cumët ala zirca 430.000 persones dl Südtirol de se nuzé de si dërt de lité y de tò pert ala veles dl Cunsëi provinziel de n dumënia. Jì a lité renfurzea la democrazia.
N dumënia che vën, ai 22 d’utober 2023, vëniel lità l Cunsëi provinziel nuef. 500 sezions de vela te duta la Provinzia ie daviertes per la vela dala 7:00 nchin la 21:00. L Presidënt dla Provinzia ti la cumët ai zitadins y ala zitadines de jì a lité.
"Lité ie n dërt di zitadins y dla zitadines, ma nce n duvier, cun chël che i/les possa y dëssa sëurantò respunsabltà soziela", sotrissea l Presidënt dla Provinzia. "Na partezipazion litela auta renfurzea la coejion, uel dì l tenì adum dla sozietà, l ti dà vivanda ala cultura democratica y ti dà sustëni ai reprejentanc politics y ala reprejentantes politiches te si atività."
"Ne jì nia a lité ie la piecia dla veles", ie la cunvinzion dl Presidënt dla Provinzia. "Chi che ne va nia a lité ti lascia la dezijion sun l daunì de si ncësa ai autri. Plu persones che tol pert ala vela y plu che l lëur dl Cunsëi provinziel y dla Jonta provinziela ie legitimà." Y dal pont de ududa dl’autonomia dl Südtirol vala dantaldut nce dla reprejentanza per la mendranzes, sibe te na pruspetiva interna sibe oravier.
"Dantaldut te chësc nosc tëmp de crises ie na partezipazion democratica ampla de gran mpurtanza", dij l Presidënt dla Provinzia. "Vieres tl’Europa y tl Mediurient, la gran ëuta dl’energia pervia dla mudazion climatica, for de majeri flusc de muciadives, la mancianza de cuatieres y priejes for plu auc – l ie truepa tematiches che tribulea la jënt." Perchël ie n parlamënt provinziel che funziunea bën y n guviern provinziel che ie bon de lauré y che possa se stizé sun cundizions politiches tleres plu mpurtant che mei, per ti vester, se mpenian deberieda, ala gran ndesfidedes.
Ai 22 d’utober vëniel lità de ndut 35 cunselieres dl Cunsëi provinziel. I/les determinea pona danter ëi/ëiles l Presidënt dla Provinzia/la Presidënta dla Provinzia y la Jonta provinziela. 488 candidates y candidac se à pra chësta vela provinziela metù sun de ndut 16 listes per n mandat.
42.197 dla 429.841 persones cun dërt de lité tl Südtirol à bele pudù dé ju si usc tres curespundënza. Duta l’autres ie sën cherdedes a lité n dumënia. I locai de vela ie davierc dala 7.00 daduman nchin la 9.00 da sëira. La cumpededa dla ujes vën fata riesc dadedò.
Duta la nfurmazions n cont dla veles ie da liejer sot a: www.wahlen.provinz.bz.it
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red
