Atualità
Di dl'autonomia: prejentazion dl prugram ai 31 de agost
Sota l titul "Autonomia reala" vën chëst ann urganisà l "Di dl'autonomia" n merdi, ai 5 de setëmber. L prugram unirà prejentà n juebia, ai 31 de agost, te na cunferënza stampa.
Truepa scumenciadives sun y ntëur ala Plaza Magnago a Bulsan vën urganisedes per l di dl'autonomia de chëst ann, ai 5 de setëmber. Dal chino sul'autonomia ala mostra fotografica, dal speed dating cun i cunselieres provinziei a na cunsulënza per persones cun handicap, nchin ala traverseda highline dla Plaza Magnago.
L guviern provinziel y l cunsëi provinziel ie urganisadëures dla manifestazion.
Na sëuraududa dl prugram dà l presidënt dla provinzia Arno Kompatscher y la presidënta dl cunsëi provinziel Rita Mattei dala cunferënza stampa
n juebia, 31 de Agost 2023,
dala 10
tla chëurt dedite dl Landhaus 1, Plaza Magnago, Bulsan
La presidënta dla stazion de usservazion provinziela per i dërc de jënt cun handicap Michela Morandini nfurmerà sun l nclujion tres comunicazion zënza bariera. Barbara Weis, Luca Bizzarri y Mathias Stuflesser dla repartizion cultura tudëscia, taliana y ladina dla provinzia dà na sëuravijion dl prugram de chino sun l tema autonomia y dla mostra fotografica "Autonomia reala" sun l svilup culturel y politich dl Sudtirol di ani 1980 y 1990.
Di dl'autonomia
Ai 5 de setëmber 1946 à l minister per i stac fulestieres Karl Gruber y l prim minister dla Talia Alcide Degasperi firmà l tratat de Paris. Chësc tratat fova l prim var tla direzion per l'autonomia dl Sudtirol che on al didancuei, cun chël che, a desfrënza de autri, on na basa de dërt nternaziunela. Per chël festejea la Provinzia de Sudtirol bele da trueps ani ai 5 de setëmber l di dl'autonomia.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/mpi/tka/san
