Atualità
Urtijëi ie n chemun a mesura dla families
Cun l Audit “FamilyPlus” y si zertificat vëniel mustrà su tan inant che i chemuns ie a mesura dla families. Ai 19 de mei à Urtijëi giapà chësta uneranza coche sesto chemun dla provinzia.
L bën dla families à truep aspec: chësc ie unì ora a na maniera tlera ai 19 de mei pra la sëurandata dla uneranza Audit "FamilyPlus – Familie leben, vivere la famiglia, viver la familia" al chemun de Urtijëi. Dala mensa per la persones atempedes nchin ala kita, dal’asssitënza domesdì ntan dut l ann di mutons/dla mutans tla prima tlasses nchin a de bon cunliamënc locai dla curieres – chëstes y truepa d’autra mesures ie unides relevedes tl pruzes Audit y dëssa sën mo unì svilupedes. "Messon ti sté do per pudëi inant sodesfé i bujëns dla families", à sotrissà l ambolt Tobia Moroder. A Urtijëi ie la formulazion "bën dla families" bele da truep ani mplenida de vivanda, à dit Moroder, y la referënta de chemun Martina Comploi à njuntà che a Urtijëi possen tenì cont dla bona culaburazion tla valeda y dla lies dl luech. Chësc ie unì mustrà su cun n valguna mprenscions dl’ativiteies dl VKE de Gherdëina, che pieta per duta la valeda n prugram scialdi rich y desferenzià per la families te duc i trëi chemuns de Gherdëina.
Coche un di proiec lumieres de Urtijëi iel unì prejentà la rë per la families "FamiLiam". Chësta rë ie unida metuda su tl 2019 per sustenì mesures a bën dla families. I culaburadëures tla rë ie dlongia l chemun de Urtijëi nce i chemuns de Sëlva y Santa Cristina, l raion saniter y soziel Gherdëina, la Kita, la direzion dla scolina Ladina, la lia tët per la junëza "Nëus Jëuni Ghërdeina", la sezion de Gherdëina dl VKE, la cunsulënza per la families y na reprejentanza tl ciamp dl turism.
L’assessëura per la familia Waltraud Deeg à nunzià tl spezifich l lëur de rë coche n criter de suzes fundamentel acioche la families posse viver n’atmosfiera plajëula: "L chemun ie la unità aministrativa che ie plu daujin ala families. Nosc travert ie chël de crië te duc i 116 chemuns dla provinzia rëies stersces che sustën la families y che ti dà la puscibltà ai mutons de crëscer su bën." I chemuns che à fat tres l pruzes Audit "FamilyPlus" cun suzes ie dlongia l chemun de Urtijëi i chemuns de Schenna, Naturns, Al Plan, San Martin de Tor y Sterzing. L pruzes Audit funziunea do n model dl Vorarlberg y ie unì adatà ai bujëns tl Südtirol, à spliegà la diretëura dl’Agenzia per la Familia Carmen Plaseller.
De plu nfurmazions sun l Audit ie da giapé tla Agenzia per la families y online sot a www.provinz.bz.it/familyplus.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/ck/red
