Atualità
Le monn ne basta nia: Daurida la mostra nöia a Al Plan de Mareo
Plü de 40 operes fotografiches de Fabian Haspinger sará da odëi tl Zënter dl Parch natural Fanes-Senes-Braies a Al Plan de Mareo. La mostra é gnüda daurida inier da sëra (25 de jügn).
Tl Zënter dles vijites dl Parch natural Fanes-Senes-Braies sarál da odëi cina la fin de otober la mostra speziala “Le monn ne basta nia” cun plü de 40 operes fotografiches de Fabian Haspinger. La mostra fotografica é gnüda daurida inauguré inier da sëra (25 de jügn) en presënza dl artist.
Le proiet fotografich é gnü presenté da Ruper Larl dl'assoziaziun Fotoforum de Desproch. Te sües fotografies él l'artist che mostra i paesaji dl monn alpin mudá dales aziuns dla porsona. Le focus é insciö sön les strotöres realisades dala porsona tla natöra, sciöche por ejëmpl plataformes panoramiches, percursc de devertimënt, istalaziun y auti. I paesaji da munt é insciö paladines. Cun sües fotografies él Haspinger che ó invié ala reflesciun mostran chëstes mudaziuns fates dala porsona.
“Canche i rodi amesa nosta regiun, amarsciada dal turism, spo me pënsi che la belëza dla natöra ne bastes nia, mo i che i orun tres intergní, amplié, splighé y mioré”; á dit Haspinger che á metü man da fá les fotografies te chësc contest dal 2017 inant. “Ci che dess ester istalaziuns artistiches é pordërt stromënc de aurela cörta por i vijitadus”, dij Haspinger. Le titul dla mostra “Le monn ne basta nia” é n pinsier che vá tla direziun che ala porsona ne ti bastel nia la dimenjiun naturala dl monn y che ara ó porchël la mudé.
“L'esposiziun é n invit ala reflesciun sides por i residënc sciöche ince por i ghesć. I abitanc oress tres ti pité val' de nü ai vijitadus che se damana novités. A chësta manira vëgnel a se le dé n consum dla tera y dl monn che mëss se adaté a tres de plü dejiders y domandes. I sun sigüda che la novité plü importanta é da ciafé sön trusc nia conesciüs. Chësta é la sfida plü importanta: da mantigní la autentizité en ecuiliber cun la natöra”, á dit l'assessuria provnziala por la natöra y le svilup dl paesaje Maria Hochgruber Kuenzer .
La mostra fotografica sará da odëi cina ai 31 de otober dl 2021 tl Zënter dles vijites dl Parch Fanes-Senes-Braies, strada Catarina Lanz 96 a Al Plan de Mareo.
USP/sa
Galaria dales fotografies
