Atualità
Covid-19, tesć asvelc y restriziuns nöies
Da en sabeda jará en forza n'ordinanza nöia por smendrí i contaji da Covid-19. A scora en presënza jará ma i mituns y les mitans de geniturs che fej laurs essenziai. Tesć asvelc por 350.000 porsones.
Tesć asvelc („antigenici“) por 350.000 südtirolej y mosöres plü strëntes por la scora y les ativités de produziun. Chisc é i punc prinzipai di provedimënc tuc incö (10 de novëmber) dala Junta provinziala do na debatüda ampla por atué les mosöres por archité la defujiun dl coronavirus tl Südtirol. „La situaziun di contaji é dër critica – á dit le presidënt Arno Kompatscher tla conferënza stampa – i sun rová a prësc le 50 porcënt de positifs danter les porsones che á fat le test por le pröm iade, n numer da spavënt alt. I un insciö messü tó mosöres nöies por evité che le sistem sanitar ne sides nia plü bun da respogne ales nezescités de cura.” Le presidënt á dit che tratan l’isté él gnü aumenté le numer di lec ti reparc de terapia intensiva rovan a 77 sciöche preodü dal “Plann pandemia”. Aladô dl presidënt Kompatscher sarál poscibl da rové a 100 lec, “mo le problem é che vigni de röiel paziënc nüs te ospedal y mec i lec vëgn bele adorá”. Kompatscher á anunzié n’ordinanza nöia che gnará scrita ti proscims dis y che jará en forza da en sabeda ai 14 de novëmber por döes edemes cina ai 28. Le fin dl’ordinanza é chël da smendrí le plü che ara vá i contaji danter les porsones.
Ativités de produziun y scores
Por ci che reverda la reduziun dles ativités de produziun á Kompatscher anunzié che al vëgn dötaurela analisé les mosöres adöm cun i rapresentanc dles categories interessades. Le funzionamënt dla produziun nezesciara gnará garantí mo al sará preodü restriziuns por ci che reverda i sorvisc de mensa y söi cantiers podarál ma gní fat i laurs de prescia. Por ci che reverda la scora á le presidënt anunzié che da en lönesc ai 16 de novëmber él preodü la didatica a destanza ince por les classes dla pröma mesana por döes edemes alalungia. L’edema che vëgn sarál garantí l’insegnamënt en presënza y l‘assistënza tles strotöres cina ai 3 agn, tles scolines y tles scores elementares por düc i mituns y dötes les mitans de geniturs che fej laurs essenziai (personal dla sanité, dla scora y di sorvisc de trasport, dla sigurté, …).
Tesć asvelc por 350.000 abitanc
„La gran novité sará che al é preodü ince na strategia ativa cuntra le coronavirus”, á splighé Kompatscher. Da en vëndres ai 20 de novëmber inant gnarál fat tesć asvelc (“antigenici”) a 350.000 porsones sön basa volontara. “Al é na desfida dantadöt dal punt de odüda dla organisaziun, olache al daidará para la Proteziun zivila y i Comuns. Le fin é chël, sciöche bele fat te dui Comuns, da isolé les porsones che porta para ala defujiun dl virus. Te chisc comuns sunse passá te püch tëmp da n indesc RT sura 1,5 a sot a 0,5. I fajun chësc por fá a na moda da rové le plü debota che ara vá indô zoruch ala normalité”, á dit Kompatscher. Le proiet gnará organisé da 800 operadus dla sanité cun 184 zëntri por fá i tesć sön döt le teritore provinzial.
LINK VIDEO
Il video della conferënza stampa de Kompatscher
USP/fgo
Galaria dales fotografies
