Atualità
Covid-19, da en sabeda inant mosöres nöies te Südtirol
I bars restará stlüc, botëghes y restoranc messará stlü dales 18, degönes manifestaziuns, proibí da jí fora de ciasa do les 22 aldinfora dles gaujies de nezescité. Les mosöres jará en forza en sabeda.
La situaziun dl’epidemia Covid-19 te Südtirol é ti ultimi dis gnüda ciamó da peso. Incrujan i dac dl’Aziënda sanitara cun le control sperimental dles eghes pazes che mosöra la presënza dl virus, é la Junta provinziala, rovada adöm incö (29 d’otober) tres videoconferënza, rovada ala conclujiun che an messará s’aspeté che i caji de positivité al SARS-CoV-2 jará ciamó sö. “I messun intergní atira y cun moröres importantes por fá che le virus ne se desleries nia fora – á anunzié le presidënt Arno Kompatscher – cun le fin da sconé la sanité dla popolaziun y da straverdé la scora y le laur. Al n’é nia na dezijiun scëmpla, mo al é n vare che i messun fá. Sce dötes y düc colaborun cun disciplina y responsabilité, sunsi sigü che i sarun bugn da tigní sö le virus”.
Ordinanza nöia en forza da en sabeda
Les mosöres nöies contignüdes tl’ordinanza che gnará firmada indoman (vëndres ai 30 de otober) jará en forza en sabeda ai 31 de otober y ará na dorada cina en mertesc ai 24 de novëmber. L’ordinanza prevëiga la stlüta de bars, dlaciaries y conditories. I restoranc y les botëghes (al ne vëgn nia conscidrades chëres che vënn mangiaries y apoteches) messará stlü dales 18:00. Al jará en forza na proibiziun da tigní evënc y manifestaziuns, ativités de cors y musighes. La proibiziun da se möi da ciasa sará ativa dales 22:00 ales 05:00 da doman. Al romagn la poscibilité da se möi te chësc orar por gaujes de sanité, de laur y de nezescité. Al ne podará nia gní organisé festes privates y al sará poscibl da fá sport ma singolarmënter. Vigni sport de alenamënc de grup y sport cun contat ne sará nia conzedü.
La didatica en presënza vëgn garantida y reverda i sorvisc de assistënza por mituns cina i trëi agn, les scolines, les scores elementares y mesanes. Por les scores altes él preodü che cina la fin de otober messará le 50 porcënt dles ores gní fates tres la didatica da ciasa. Al sará d’oblianza da se vistí la maschera tratan dötes les ores de insegnamënt.
I contignüs dl’ordinanza y informaziuns ajuntives gnará presentades tratan na conferënza stampa
en doman, vëndres ai 30 de otober
dales 11:00
tla curt interna de Palaz Widmann
plaza Silvius Magnago 1
a Balsan.
Avis por i media – Al é nezesciar da se registré (jornalisć, tecnics, cameraman yii) pro l’Ajentöra de stampa y comunicaziun menan na email ala misciun asp.redazione@provincia.bz.it cina les 18:00 de incö jöbia (29 d’otober). Canche al sará arjunt le numer conzedü ne sarál nia plü poscibl da tó pert en presënza. La conferënza stampa sará da odëi ince online sön la plata Facebook y söl canal Youtube della Provinzia.
Link video e audio
USP/mb
