Atualità
Banda leria, l’acordanza Provinzia-Telecom por superè le “digital divide”
Le Presidënt dla Junta provinziala Luis Durnwalder, y le presidënt de Telecom Italia Franco Bernabè, à sotescrit (INCÖ) ai 16 de dezëmber a Balsan n’acordanza che portarà al superamënt dl “digital divide”. Cun la banda leria sön döt le raiun arà 120 mile porsones azès al internet aslöm.
L'acordanza vëiga danfora che Telecom Italia pois adorè a paiamënt la rëi te fira otica dla Provinzia por amplié la desponibilité sön le teritore dles linies adsl a na velozité d’azès de altamo ćina a 7Mbits, a na moda che passa 120.000 zitadins pois adorè l’internet aslöm, y por curì döt le raiun te 30 mëisc. Cun chësc proiet podarà tres de plü porsones, firmes y istituziuns dl post rové pormez ales tecnologies digitales de banda leria nöies y ara jarà da curì le raiun por mirit dl’adoranza dles rëis te fira otica che é bele gnüdes realisades o gnarà realisades dala Provinzia de Balsan ti proscimi dui agn.
La colaboraziun cun la Provinzia de Balsan vëiga danfora n investimënt da pert de Telecom Italia de zirca 3,6 miliuns de euro cun chi che ara jarà da anulè le “digital divide” tres le coliamënt te fira y l'adatamënt de sües zentrales. Le presidënt dla Provinzia Luis Durnwalder à detlarè: "Realisé na rëi te fira otica cun chëra che ara vais da colié düć i Comuns dl Südtirol é na priorité dla Junta provinziala, che à investì tröp. Cun chësta acordanza vara da fà n gran vare inant por garantì l’internet aslöm". "L'acordanza da incö desmostra che sce les istituziun se dà da fà concretamënter vara da tó demez le “digital divide” che rapresentëia – à sotrissé Franco Bernabè – le pröm travert indiché dal'ajënda digitala europeica".
usp
Galaria dales fotografies
Landeshauptmann Durnwalder zur Bedeutung des Abkommens
- Scarica il file audio 683 kb
