Atualità

Scora ladina: Fin dl ann de scora por 3167 scolars y scolares

Incö, vëndres ai 14 de jügn se röia l’ann scolastich por les scolines, scores elementares, mesanes, altes y profescionales.

La scora é rovada - Foto: pixabay.com

Tles scolines y scores dles valades ladines s‘âl scrit ite tl ann scolastich 2018/19 indöt 3167 mitans y mituns. Por ci che reverda les scolines ladines él sté 723 mitans y mituns che á frecuenté öna dles 17 scolines dles valades ladines. Tles 15 scores elementares dles valades ladines él sté indöt 1142 scolars y scolares che s’â scrit ite tl ann scolastich 2018/19, por ci che reverda les scores mesanes é le numer de iscriziuns sté 782. Indöt á 520 scolars y scolares fat öna dles cater scores altes o la scora profescionala „Cademia“.

Le numer di scolars ametüs al ejam final dles scores mesanes é de 266 sön indöt 266 scolars scric ite te terza mesana. Por ci che reverda les scores altes é düc i 103 scolars ametüs al ejam de Stat de conlujiun dl percurs scolastich dla scora alta che metará man ai 19 de jügn.

Por l’assessur por la scora ladina Daniel Alfreider él n gran valur da odëi la gran profescionalité, ligrëza y impëgn che les maestres y i maestri y le personal pedagogich se dá da fá tl insegnamënt y te so laur de formaziun. "Le sistem scolastich ladin á sües raisc tl insegnamënt paritetich y tla trasmisciun dla cultura ladina é chësc sará ince dui pilastri fondamentai por le dagní. Implü él fondamental da lauré sön la inclujiun y la partezipaziun tl monn dla scora", insciö Alfreider.

Por l’intendënta dles scores ladines Edith Ploner él ince sté meso tl ann de scora 2018/19 da realisé indô tröc traverc tla formaziun de pici y majeri mituns y mitans, da fá vari inant tl slarié fora conoscënzes y competënzes ti ciamps desvalies.

La colaboraziun cun les families é n tema fondamental por svilupé n sistem formatif che vá a bëgn de mituns y mitans. De chësc vers ciararanse da lauré inant ince ti proscimi agn por arjunje n sistem formatif che valorisëia la pluralité y l’inclujiun.

Tl ann scolastich 2018/19 ti él gnü dé n gran pëis al svilup dl imparé, al imparé sozial, al svilup dles competënzes tl ciamp dla sciënza y dla tecnica y sambëgn dagnora ince ales competënzes plurilinguales, azënt sterch de nosc sistem formatif.

L’assessur y l’intendënta rengraziëia dötes les colaboradësses y düc i colaboradus dl sistem formatif ladin por le gran impëgn desmostré tresfora a bëgn dles scolares y di scolars dles valades ladines. Les persones che laora tles scolines y tles scores á pité a nostes jones y a nüsc jogn n bun acompagnamënt te so svilup personal, formatif y cultural. Ai ti aoda a döt le personal de scora y scolina y ales scolares y ai scolars adöm cun sües families de beles vacanzes da d’isté. “Ales scolares y ai scolars che á ciamó da stlüje jö so percurs cun n ejam ala fin dla scora mesana y alta ti aodunse na buna conclujiun por podëi dedô se gode de beles vacanzes y por passé dedô a n ater scalin”, insciö Alfreider y Ploner.

USP

Galaria dales fotografies