Atualità
Consulta culturala Ladina: Christa Kasslatter é l’aconsiadëssa nöia
Les competënzes primares dla consulta culturala é chëres da sostigní les assoziaziuns culturales ladines y da valuté i finanziamënc provinziai culturai.
Le sostëgn ales lies culturales y ai artisc dles valades de Südtirol é al zënter dl ativité culturala dl dipartimënt competënt por la cultura ladina. Chësc sostëgn dëida le mantegnimënt y le svilup dla cultura y dl lingaz ladin. Al ti speta ince da fá propostes por manifestaziuns y ativités culturales che la Provinzia mët a jí diretamënter. Implü dess la Consulta ince sostegní la promoziun de manifestaziuns culturales. Na funziun dër importanta, ai fins de arjunjer chësc obietif (mantegnimënt y svilup dla cultura ladina) á la Consulta culturala por le grup linguistich ladin, che á podü, n gaujiun dl ultima sentada por chësc ann, saludé l'aconsiadëssa nöia Christa Kasslatter che é rovada lapró en sostituziun de Erika Castlunger. Chësta mudaziun é gnüda a se le dé porvia dl’aprovaziun dla lege dla cultura nöia dl 2015.
“N rengraziamënt sintí por süa desponibilité y profescionalité ti vá a Erika Castlunger che á mostré ince n gran interes y motivaziun da promöie ativités y proiec tl ciamp dla cultura ladina”, á dit l’assessur ladin Florian Mussner che ti dá ince le bëgngnü a Christa Kasslatter. I atri mëmbri é Bruno Senoner y Hubert Irsara (por les assoziaziuns culturales ladines) y Lois Ellecosta (sciöche espert), adöm al assessur Florian Mussner che é ince le presidënt.
La Consulta aconsiëia te so laur l Govern provinzial, dan jö arac y indicaziuns sura les domandes de contribut tl ciamp dles ativites y di investimënc culturai, sciöche ince por les artistes y artisć. Por le 2016 él gnü fat 134 arac, da pert dla Consulta, sön l’ativité culturala ordinara (anuala) sura proiec straordinars, investimënc y proiec artistics.
USP
