Atualità
“Esperiënza d'ert tl Südtirol”: presentaziun dl liber tla Teßmann
“Esperiënza d’ert tl Südtirol” á inom le liber dl autur Andreas Hapkemeyer che gnará presenté ai 14 de jügn tla Biblioteca provinziala Teßmann a Balsan.
Andreas Hapkemeyer, le diretur dl setur Inrescida y insegnamënt tl Museion a Balsan, ti dá te süa publicaziun nöia n'odlada straordinara ala storia dl'ert tl Südtirol analisan dantadöt l’architetöra y les operes d’ert grandioses tl Südtirol. Al pëia ia dai afrësć dla pröma eté medievala y dl baroch por rové al program de costruziun dl fascism talian cina al'ert contemporana: co vëgn pa presenté le mal tl'ert romanica, ciodí ne conesciunse pa nia l'inom de depenjadus medievai; cara é pa la desfarënzia danter les laubes dla cité vedla de Balsan y chëres de Gries. L’autur Andreas Hapkemeyer presentará so liber „Erlebnis Kunst in Südtirol. Von Fratzen, Fresken und Fassaden“ en mertesc, ai 14 de jügn dl 2016 dales 20.00 tla biblioteca Teßmann. La manifestaziun vëgn metüda a jí adöm ala Biblioteca provinziala Dr. Friedrich Teßmann en colaboraziun cun la ciasa edituria Folio.
La biblioteca provinziala Friedrich Teßmann á süa sënta tla strada Armando Diaz 8 a Balsan, telefon 0471 471814, e-mail: info@tessmann.it; http://www.tessmann.it/
rc
