Atualità
Europeada: ince n’incuntada culturala cun les mendranzes linguistiches
En ocajiun dl’Europeada 2016, le campionat europeich dl jüch al palé dles mendranzes europeiches, sostëgn la Provinzia de plü evënc culturai.
Nia ma le palé sará, mo ince la cultura sará tl zënter dl’ediziun 2016 dl’Europeada, la manifestaziun sportiva che mët tl zënter les mendranzes europeiches y che gnará tignida dai 18 ai 26 de jügn l’atraziun prinzipala tla Val Badia y tla Val de Puster. „I ún ince orü anuzé l’ocajiun unica dla presënza dles tröpes delegaziuns de mendranzes por mët da jí de plü incuntades culturales por ti presenté a nüsc ghesć la storia y la cultura di ladins y di südtirolej“, spliga l’assessur provinzial por i museums Florian Mussner.
La Junta provinziala á insciö metü a desposiziun n contribut straordinar por podëi organisé n program cultural adaté. N pröm de cun incuntades y barat de esperiënzes é sön le program por en mercui ai 22 de jügn tla sënta dl Museum Ladin Ciastel de Tor, ti dui dis daldô, dai 23 ai 24 de jügn, gnarál metü da jí n convëgn internazional sön les mendranzes linguistiches y sü museums. Le convëgn internazional dess ince ester n’ocajiun d’analisa dl’importanza dles ativités museales por les mendranzes linguistiches t’Europa. N punt de stüde prinzipal dl'incuntada sará les formes futures dla promoziun dl'arpejiun culturala. De plü sará ince i esperc dl setur di museums ala pert, danter l’ater le presidënt dl Consëi internazional di museums (ICOM) Hans Martin Hinz y plü rapresentanc dles mendranzes linguistiches europeiches.
La partezipaziun al convëgn é debann y daverta a düc i interessá. An pó se scrí ite cina ai 10 de jügn tres la plata internet dl Museum Ladin, www.museumladin.it. Le numer di partezipanc é limité. Le convëgn gnará organisé tla sënta dl Istitut Ladin Micurá de Rü y la scomenciadia vëgn ince sostignida dala FUEN (Federal Union of European Nationalities).
Por plü informaziuns: Museum Ladin Ćiastel de Tor, via Tor 65, San Martin de Badia, tel. 0474 524020, www.museumladin.it
rc
