Atualità
Scora, scolina y familia: „Costruí na rëi de dialogh costanta“
La colaboraziun danter scora, scolina y geniturs é dër atuala y tres plü damanada. Cun chësta tematica s'á dé jö döes sëres de dialogh a Urtijëi y a La Ila.
Te döes incuntades de dialogh a Urtijëi (ai 14/04) y La Ila (ai 21/04) cun dötes les componëntes dl monn dla scora se á le Departimënt Educaziun y Scora Ladina dé jö cun le dialogh danter scolina, scora y les families. „La colaboraziun danter scora y familia é costantamënter tl svilup, l’insegnamënt individual, les ativités extrascolastiches y les sfidades che vëgn dal’integraziun y intlujiun é ma n valgügn di punc a chi che scolars, geniturs y maestri mëss ti respogn aldedaincö“, spliga l’assessur por la scora ladina Florian Mussner. Porchël él fondamental da organisé incuntades de dialogh, olache trames döes les perts pó se baraté fora por ciafé soluziuns y idees, insciö Mussner.
L’Intendënt por le scores ladines Roland Verra á sotrissé che ti ultims agn él sté de gran mudaziuns tla strotöra dla sozieté y ince dles families ladines. „Te so laur da vigni de registrëia les insegnantes y i insegnanc aldedaincö n gran pluralism de valurs y minunghes che se damana na gran flessibilité y la disponibilité al dialogh danter istituziuns formatives, geniturs, studëntes y studënc“, insciö Verra. I organs colegiai dles scores messará ince tl dagní pité poscibilités por na discusciun sinzira y la partezipaziun di geniturs ales dezijiuns dles scores.
La Scora Ladina á insciö metü da jí bele dal 2014 inant incuntades costantes de dialogh por resté tres en contant y costruí na rëi danter scora y familia. „Insciö pó i mudamënc, por ci che reverda por ejëmpl ince la reforma scolastica statala o conzec de pedagogia moderns gní atuá en colaboraziun y cun les sinergies de düc i partezipanc“, spliga l’ispetur Albert Videsott.
Te süa relaziun á l’ispeturia Carla Comploj dit che l’educaziun dles mitans y di mituns se ghira na buna colaboraziun danter scolina, scora y families. Crëta, respet y stima danter geniturs y insegnanc é les condiziuns de basa por che chësc raport garates bun, recorda Comploj y sotignëia che “te chësc dialogh mëss i geniturs y insegnanc s’odëi sciöche partners dl medemo livel por podëi arjunje na condivijiun di valurs de basa in cunt dl’educaziun“.
Te deplü workshops á geniturs y le personal dles scores spo lauré fora strategies por costruí n bun raport danter scolina, scora y les families. Tratan la presentaziun di resultac dles discusciuns él gnü fora na gran unitarieté por ci che reverda i valurs fondamentai de chësc raport: respet, partizipaziun, trasparenza, sinzirité y n spirit davert de dötes les componëntes dles comunités scolastiches. Al é ince gnü porté dant propostes por aziuns concretes che gnará sëgn valutades dales istituziuns scolastiches y dess ester n contribut por renforzé la rëi che liëia adöm les scolines, les scores y les families ladines.
rc
Galaria dales fotografies
Foto: Departimënt Scora y Cultura ladina
Foto: Departimënt Scora y Cultura ladina
