Atualità
30 agn Archif provinzial: la pröma sëra de zelebraziun é stada n suzes
La seria de manifestaziuns por festejé i 30 agn dl Archif provinzial é gnüda inaugurada inier (ai 31/03) dal assessur provinzial Florian Mussner cun na sëra tl Palaz mercantil da Balsan. L’evënt é gnü dediché a Anton Melchior von Menz, mezen y gran protagonist dl svilup musical de Balsan.
Te sües parores de salüt á l’assessur provinzial por i bëgns culturai Florian Mussner recordé la varieté dles ativités dl Archif provinzial y so rode important por la sconanza y l’ajornamënt dl'arpejiun culturala dl Südtirol: „L’Archif provinzial é na pera miliara fondamentala por la inrescida y conservaziun dla storia locala.“ I resultac de chësc impëgn vëgn desmostrá da trënt agn incá dala suraverda söi archifs comunai, dal’assistënza ai archifs privac storics y eclesiastics, dal sostëgn ai cronisć dl paisc, dala inrescida sön la storia locala y dales publicaziuns scientifiches, á recordé Mussner.
Le scomenciamënt dla seria de manifestaziuns por i trënt agn dl Archif é gnü organisé tl Palaz mercantil de Balsan sciöche sëgn ince dla buna colaborzaiun cun les atres istituziuns culturales y museales, á sotligné la direturia aministrativa dla Repartiziun Bëgns culturai Christine Roilo. De plü é les scomenciadies preodüdes por le 2016 ince en colaboraziun cun la scora profescionala „Emma Hellensteiner“ a Porsenú, le Südtiroler Burgeninstitut y le Museum zivich de Balsan.
Tratan la sëra á ince le presidënt dla Ciamena dl Comerz Michl Ebner sotligné la buna cooperaziun danter le Museum mercantil y l’Archif provinzial, che an ne vëiga nia ma cun le barat de reperc y ogec d’esposiziun mo ince tres l'organisaziun de aziuns y manifestaziuns deboriada. Le grof Ulrich Toggenburg á recordé che süa familia á ciafé tl Archif provinzial n partner afidabl y profescional por la conservaziun dla coleziun preziusa de ogec musicai coiüda adöm dal mezen y comerziant Anton Melchior von Menz (1757 – 1801). La sëra é gnüda acompagnada musicalmënter dal’Academia de archëc de Balsan y cun na conferënza de Evi Pechlaner dl Archif provinzial sön Menz, n protagonist dl svilup dla vita musicala a Balsan tratan la fin dl Setcënt. La coleziun de proprieté di grofs Toggenburg vëgn manajada dal 2005 inant dal Archif provinzial.
rc
Galaria dales fotografies
