Atualità
NVIT Brosciures sun la ntegrazion: presentazion a Al Plan y Urtijëi
Acumpanië y alesiré la ntegrazion tla scoles y scolines ladines cun cunsëies y nfurmazions d’utl: chësc ie l fin de doi brosciures nueves svilupedes dal Serivisc per la Consulënza psicopedagogica y per la ntegrazion dla Ntendënza ladina per i genitores cun n background de migrazion y per l personal didatich/pedagogich. La brosciures nueves unirà presentedes ai 07/03 a Al Plan y ai 09/03 a Urtijëi.
Da n valgun ani ie la cumpëida di mëndri cun background de migrazion tla scolines y scoles dla Val Badia y de Gherdëna for majer ajache for plu y plu families de migranc vën a sté te nosta valedes. Abiné l lëur y na cësa uel dì per chësta families miuré la condizions de vita y pudëi ti dé n daunì a si mutans y mutons.
La scolina y la scola ie, adum cun l Departimënt Educazion y Cultura ladina, dassënn mpeniedes tl pruzes de ntegrazion y dl nseniamënt plurilinguistich, che ie la basa dl sistem educatif ladin. Danter l’azions ududes danora per chësc fin, presentea l Servisc per la Consulënza psicopedagogica y la ntegrazion dl Departimënt Educazion y Cultura ladina doi strumënc de nfurmazion y de furmazion: i “Cunsëies per i genitores” di mëndri cun background de migrazion y i “Orientamënc per nsenianc y personal pedagogich”.
I “Cunsëies” ie na brosciura cun de blot dessënies da culëur, rica de nfurmazions de utl per lascé ntendër ai genitores migranc l sistem scolastich y si referimënc pedagogics, linguistics y culturei. L segondo strumënt, i “Orientamënc”, puderà ti judé ala nseniantes y ai nsenianc, che à chisc pitli te tlas, a lauré cun referimënc y linies tleres, n cont per ejëmpl de nseniamënt plurilinguistich, valutazion, aculienza y n.i.
I doi strumënc unirà presentei
n lunesc, ai 07 de merz dl 2016
dala 16.00
tla sënta dla scola mesana de Mareo
streda Plan de Corones
a Al Plan de Mareo
y
n mierculdì, ai 09 de merz dl 2016
dala 16.00
tla sënta dla scola elementera de Urtijëi
streda Scurcià 10
Urtijëi
cun la partezipazion dl Assessëur Florian Mussner, dl Ntendënt Roland Verra, la Ispetëura per la ntegrazion Carla Comploj y dla culaboradëures dl Servisc Irene Costa y Olimpia Rasom che à njinià ca l material. Duc i interessei ie nviei a unì y tò pert ala doi manifestazions.
USP
