Atualità
De internazional dl lingaz dla uma – Mussner: „Richëza y porta sön le monn“
„La promoziun dl lingaz dla uma te n contest plurilingual é un di obietifs prinzipai de nosc sistem scolastich che vëgn renforzé y svilupé inant tresfora“, dij l’assessur por la scora ladina Florian Mussner en ocajiun dl De internazional dl lingaz dla uma che vëgn festejé ai 21 de forá.
Sön proposta dl’UNESCO á les Naziuns Unides detlaré che ai 21 de forá de vigni ann vëgnel festejé le De internazional dl lingaz dla uma. Dal ann 2000 incá vëgnel insciö recordé vigni ann ai 21 de forá la gran varieté di lingac destenüs fora por le monn. Di indöt 6.000 lingac é do n arat dl’UNESCO söporjö le 50 porcënt en prigo da scomparí. La tematica de chësc ann dl De internazional dl lingaz dla uma é „l’insegnamënt cualitatif, i lingac d’insegnamënt y i resultac dl imparé i lingac“.
Dötadöm vir tl Südtirol plü co 17.000 porsones adultes che á le ladin sciöche lingaz dla uma (ASTAT, barometer linguistich 2014). Por le sistem scolastich ladin á i lingac d’insegnamënt albü dala fondaziun dla scora partitetica inant n rode fondamental. „L’insegnamënt paritetich s’á desmostré ti agn sciöche le dër tru, sides por sostigní l’educaziun de vigni scolar y scolara co ince por renforzé la convivënza danter i grups linguistics tl Südtirol“, dij l’assessur Mussner. Na posiziun speziala á dagnora albü ince l’insegnamënt dl lingaz dla uma tles scores dles valades ladines. „Ince sce le tëmp d’insegnamënt tles scores é limité unse lauré cotan ti agn por valorisé les ores de ladin tres la realisaziun de material didatich aposta y cun l’integraziun de formes de pedagogia interatives y nöies bele dala scolina insö“, insciö l’assessur por la scora ladina.
Na conescënza adatada dl lingaz dla uma ne é nia ma importanta por le singul, mo ince por le svilup dla sozieté y por le mantignimënt dla arpejiun culturala y linguistica, insciö Mussner. Sciöche al vëgn ince demostré dai dac dl baromenter linguistich dl ASTAT por le 2014 é la defujiun dl Ladin tres ciamó dër alta te Gherdëna (82,2 porcënt) y tla Val Badia (93,6 porcënt) y ne mostra degun sëgn da jí zoruch. Implü á l’88 porcënt di intervistá ladins dit da adoré le ladin sön le post de laur, insciö l’ASTAT. „Na conescënza ampla dl lingaz dla uma é ince la tle por imparé da conësce d’atres cultures y lingac y por odëi le plurilinguism sciöche n arichimënt cultural, che deura ince la porta sön le monn“, sotlignëia Mussner.
rc
