Atualità
Biblioteca provinziala Teßmann: Publicaziuns nöies y libri premiá
Tres la scomenciadia „Monns di libri“ tl Waltherhaus a Balsan presentëia la Biblioteca Provinziala Dr. Friedrich Teßmann ince chësc ann na seria de libri premiá y de publicaziuns nöies. Öna dles atrativités prinzipales sará l’audio-bar.
La scomenciadia „Monns di libri/BücherWelten“ tla Ciasa dla Cultura dl Waltherhaus a Balsan metará man en jöbia, ai 14 de jená dales 18.00 y jará inant cina en mercui, ai 03 de forá, tres dal lönesc cina en sabeda dales 09.00 cina ales 18.00.
La Biblioteca provinziala „Friedrich Teßmann“ organisëia de plü scomenciadies tratan la perioda dles BücherWelten: Ara arjigna indô ite l'audio-bar, olache al gnará metü fora passa 200 libri auditifs premiá tratan le 2015 por mitans y mituns, jones y jogn y porsones adultes che é gnüs chiris fora deboriada cun l'ofize linguistich dl Südtiroler Kulturinstitut. Sambëgn n'ési nia ma da odëi tl audio-bar, mo bëgn ince da aldí: pro vigni liber auditif él ejëmpli de toc da podëi aldí, indöt sura 200 ores.
Bele por le terzo iade ti vëgnel presenté a che che vá a ti ciaré ai Monns di libri na cerna de libri che é gnüs premiá dl 2015 da na iuria de comëmbri esperc y independënc cun pesć desvalis. La Biblioteca provinziala mët implü ciamó en mostra na cerna fora de so inventar: ara se trata de publicaziuns nöies dl ann 2015 dl raiun todësch. Al vëgn pité na impresciun generala dl'oferta ampla d'atualité di ciamps "Storia dla cultura", "Natöra y contrada", "Sozieté" y "Leteratöra y lingaz".
Foradechël tol la Biblioteca provinziala ince pert al De dla leteratöra dl Tirol dl Nord, dl Ost y dl Südtirol (Nord-Süd-Ost-Tiroler Literaturtag) che vëgn tigní ai 23 de jená dl 2016 tl foyer dessura dl Waltherhaus.
Por plü informaziuns: http://www.tessmann.it/la/home.html
rc
Galaria dales fotografies
Foto: OSP/Biblioteca provinziala Teßmann
