Atualità
Dis dla Porta daverta: les scores altes y profescionales se presentëia
N codejel, da desciarié ince online, cöi adöm dötes les informaziuns sön i Dis dla Porta daverta y les manifestaziuns d’informaziun desvalies organisades dai lizeums, dales scores altes, dai Istituc tecnics y profescionai por i scolars y les scolares dla terza mesana y i geniturs che mëss chirí fora so percurs de formaziun cina ai 15 de merz dl 2016.
Do la contlujiun dl percurs scolastich dla scora mesana é i scolars obliá da chirí fora, adöm ai geniturs, la scora alta o l’istitut tecnich o profescional olache se scrí ite. I Dis dla Porta daverta é na buna ocajiun por s’informé diretamënter söl post y por ciafé n’impresciun personala dl’oferta formativa y dla cuotidianité scolastica dles scores. Porchël vëgnel metü a jí ti proscims mëisc i Dis dla Porta daverta te plü scores y istituc te döt Südtirol. Chësta oferta dess ester n’ocajiun por geniturs y scolars por s’infomé avisa denant co tó daldô la dezijiun finala sön ci scora alta chirí fora.
L’Ofize Orientamënt scolastich y profescional dla Repartiziun Dërt dl Stüde á insciö realisé n codejel cun dötes les manifestaziuns che vëgn metüdes da jí de düc trëi i sistems de formaziun, ladin, todësch y talian, dl Südtirol. Les informaziuns é desponibles sön la plata internet dla Repartiziun provinziala por todësch y por talian. Le codejel por todësch contëgn ince les manifestaziuns metüdes a jí dales trëi sëntes dles scores altes dles valades ladines da plata 44 inant (dessot na suraodüda).
Istitut Tecnich Economich „Raetia“
De dla Porta daverta: ai 25 de forá cun vijites acompagnades dales 09.00, 10.00, 11.30 y dales 14.30 (prëibel se prenoté)
Partezipaziun ala „infoMesse“ por le raiun dla Val d’Isarch y Wipptal“ ai 03 de dezëmber dales 08.30 ales 13.30 tla scora profescionala provinziala „Tschuggmall“ a Porsenú
Partezipaziun ala „Picera fiera dles scores altes“ tla scora mesana „Leo Santifaller“ a Ciastel dales 14.30 ales 17.30 ai 11 de jená dl 2016
Vijites acompagnades por tlasses y/o geniturs, scolars tres poscibles sön prenotaziun
Por vijites acompagnades tl Istitut da pert de tlasses dles scores mesanes, de geniturs y/o scolars prëibel contaté diretamënter l’ITE tres tel. 0471 / 796296 o email ite.urtijei@schule.suedtirol.it
Lizeum d’ert „Cademia“ y scora profescionala por l’artejanat artistich
Presentaziun dles scores altes tla scora mesana de Lana (ai 23 de novëmber dales 14.15 ales 16.30).
Partezipaziun ala „infoMesse“ por le raiun dla Val d’Isarch y Wipptal“ ai 03 de dezëmber dales 08.30 ales 13.30 tla scora profescionala provinziala „Tschuggmall“ a Porsenú
Partezipaziun ala fiera d’informaziun scolastica dla scora mesana de Neumarkt ai 11 de dezëmber (danmisde)
Partezipaziun ala „Picera fiera dles scores altes“ tla scora mesana „Leo Santifaller“ a Ciastel dales 14.30 ales 17.30 ai 11 de jená dl 2016
Partezipaziun ala fiera d’informaziun dles scores profescionales y altes dai 14 cina ai 16 de jená dl 2016 (jöbia y vëndres dales 08.30 ales 12.30, sabeda dales 08.30 ales 16.00) tla sënta dla Université Lëdia de Balsan
Vijites acompagnades por tlasses y/o geniturs, scolars tres poscibles sön prenotaziun
Por vijites acompagnades tl Istitut da pert de tlasses dles scores mesanes, de geniturs y/o scolars prëibel contaté diretamënter le Lizeum d’ert y scora profescionala tres tel. 0471-796240 / 0471-796733 o email se.urtijei@schule.suedtirol.it lbs.st-ulrich@schule.suedtirol.it
Zënter dles scores altes da La Ila cun l'Istitut Tecnich Economich (cun la seziun Aministraziun, finanzes y marketing) y cun le lizeum (cun les seziuns Sciënzes umanes y Lingac)
De dla Porta daveta ai 03 de dezëmber dales 08.30 ales 16.00 tl zënter dles scores altes a La Ila
Sëra d’informaziun por i geniturs tl zënter dles scores altes da La Ila ai 26 de novëmber dales 20.00 inant
Vijites acompagnades por tlasses y/o geniturs, scolars tres poscibles sön prenotaziun
Por vijites acompagnades tl Zënter scolastich a La Ila da pert de tlasses dles scores mesanes, o de geniturs y/o scolars prëibel contaté diretamënter le Zënter tres tel. 0471-847252 o email itc.la-ila@schule.suedtirol.it.
rc
