Atualità
La musiga indô tl zënter dl’ediziun nöia dl contest por i jogn UploadSounds
UploadSounds é n contest de musiga che reverda döt le raiun dl’Euregio Tirol-Südtirol-Trentin. Dai 3 de novëmber é les iscriziuns davertes por düc chi che ó se candidé por tó pert al’ediziun 2015/16 de UploadSounds. Le festival é dediché ai jogn talënc de musiga.
Podëi tó pert a n tour de musiga tl’Euregio y avëi ince la poscibilité da soné n iade sön paladines de gran cités internazionales sciöche por ejëmpl l’ann passé a Hamburg y Londra: chëstes les döes componëntes prinzipales dl festival UploadSounds, le contest de musiga dl'Euregio por i jogn. Da se scrí ite él saurí: al basta da se „auto-candidé“ cun na cianta nöia y n video nü por podëi spo tó pert a na roda musicala che porta te dötes trëi les provinzies de Balsan, Trënt y Desproch. Al é ince n’ocajiun por imparé da conësce atres realtés musicales y da ciafé magari n impuls por les proscimes creaziuns musicales.
Le proiet UploadSounds é dediché a musizisć jogn sot ai 30 agn che á la residënza te öna dles trëi provinzies. Les iscriziuns por tó pert al’ediziun nöia de UpoladSounds é davertes dai 3 de novëmber. Cina ai 30 de aurí dl 2016 sarál spo poscibl da ciarié sön internet na cianta ciamó nia publicada sön la plata http://www.uploadsounds.eu/. Vigni grup musical ará la poscibilité da se presenté sön na plata intiera.
La majera atraziun dl’ediziun da inann sará indô la seria de conzerc „Upload on Tour“ cun passa 15 esibiziuns musicales dal ví di jogn musizisć te döta l’Euregio cun scomenciamënt ai 5 de dezëmber. Pro plü informaziuns prëibel consulté la plata internet www.uploadsounds.eu, (misciun email: info@uploadsounds.eu facebook: http://www.facebook.com/uploadsounds, twitter: https://twitter.com/UploadSounds).
rc
