Atualità
Biblioteca Teßmann: Discusciun sön l'adoranza di lingac sön facebook
La plataforma de interaziun soziala y digitala „facebook“ é n stromënt d’ütl por baraté fora sü pinsiers y l’adoranza di lingac te chësc contest é sté tl zënter de n’analisa che gnará presentada en mertesc, ai 10 de novëmber, da sëra tla sënta dla Teßmann da Balsan. Ala mësa torona de discusciun tolarál pert esperc dla sciënza, dla scora y dl jornalism.
Co scrí pa la jënt dl Südtirol sön Facebook? Á l’eté ince val’ da dí? Tan gonot scrí pa la jënt dl Südtirol de lingaz todësch por dialet, por talian o inglesc? Cun chëstes domandes s’á dé jö le proiet d’inrescida DiDi dl Istitut de comunicaziun spezialistica y plurilinguism dl‘Eurac. Interessant él che al é gnü fora che la lîta dl lingaz, dla generaziun jona che crësc sö cun internet, se desfarenziëia veramënter sön Facebook da chëra dla generaziun plü vedla. Messunse mo se cruzié porvia de chësc? O él n sëgn dla competënza dla jonëza da baraté jö aladô dles ghiranzes (Facebook versus compit a scora)? Rapresentanzes dl’inrescida, dla scora y dl jornalism se damana sce an scrí atramënter tl tëmp de Facebook.
Sön chëstes tematiches gnarál metü a jí en mertesc, ai 10 de novëmber, na mësa torona de discusciun dal titul "Jung und Alt - Schreiben in Zeiten von Facebook" cun Eva Cescutti dl Raiun Inovaziun y consulënza dl’Intendënza todëscia, Aivars Glaznieks dl Istitut de comunicaziun spezialistica y plurilinguism dl‘EURAC, Anne-Bärbel Köhle, redaturia y dozënta tl ciamp dl jornalism y Carla Thuile, studënta y auturia. La moderaziun sará tles mans Monika Obrist dl Ofize linguistich tl Südtiroler Kulturinstitut.
Na manifestaziun dla Biblioteca Provinziala Friedrich Teßmann en colaboraziun cun la Sozieté por le lingaz todësch/seziun da Balsan y dl Istitut de comunicaziun spezialistica y plurilinguism dl’EURAC.
La Biblioteca provinziala Friedrich Teßmann á süa sënta tla strada Armando-Diaz 8 a Balsan, tel. 0471 471814, E-Mail info@tessmann.it; http://www.tessmann.it/
rc
