Atualità
1915-2015: Opres d'ert sun la viera da udëi dai 09/10 tla Galaria Prisma
Euforia, pudëi, mputënza y decadënza ntan la viera ie la tematiches lauredes ora artisticamënter y prejentedes tla mostra 1915-2015. L unirà metù ora l'opres premiedes n ucajion dl cuncors artistich sun l centené dla Prima viera munidela metù a jì dala Repartizion Cultura y Intendënza ladina y l Südtiroler Künstlerbund. L assessëur Florian Mussner giaurirà la mostra ai 9 de utober.
L se cunfrunté cun la viera y si fazions y cunseguënzes ie la tematica zentrela de chësta mostra. Tla formes dla pitura, dl’ert ogetuela y de lëures video ti vëniel dat vijibltà ala ferides dla viera. Ot artistes y artisć se à dat ju a fonz cun i avenimënc storics y la ntraunides atueles: Sibe pra la vieres passedes che te chëles da śën se semea i destins dla populazion zevila, la emozions danter cumpascion y sënn, la mutivazions y la giustificazions.
L ie da udëi l'opres di artisć y dl'artistes Paul Feichter, Silvia Hell, Annemarie Laner, Walter Pancheri, Leander Schwazer, Martina Stuflesser, Letizia Werth y Andreas Zingerle.
La giaurida dla mostra unirà a se l dé ai 9 de utober dala 19.00 tla Galaria Prisma a Bulsan. N chësta ucajion purterà Helga von Aufschnaiter, presidënta dl Südtiroler Künstlerbund, i saluc. L rujenerà l assessëur Florian Mussner y la curadëura Lisa Trockner.
La mostra ie da udëi nchin ai 31 de utober, da merdi a sada dala 10.00 ala 12.30 y dala 16.00 ala 19.00.
I media ie nvieia a tò pert
ala giuarida dla mostra "1915-2015"
n vënderdi, ai 9 de utober 2015 dala 19.00
tla Galaria Prisma
Str. Weggenstein 12, Bulsan.
USP
Galaria dales fotografies
