Atualità
„Promemoria_Auschwitz“ 2016: Iscriziuns cina ai 31 d’otober
Dal mëis de novëmber 2015 cina jená 2016 gnarál organisé n percurs de stüde che portará indô de plü cenc de scolars dal Südtirol, dal Trentin y chësc ann ince dal Tirol, sön le iade dla recordanza a Auschwitz-Birkenau y a Cracovia. L’ediziun nöia é gnüda presentada incö (21/09) dai trëi assessurs por la cultura Mussner, Tommasini y Achammer y dales organisaziuns partezipantes.
„Promemoria_Auschwitz: il viaggio della memoria – die Reise der Erinnerung“: chësc é le titul dl iade dles recordanzes che portará ince le proscim ann 2016 indô 150 jogn dl Südtirol, 150 jogn dl Trentin y por le pröm iade ince 20 jogn dal Tirol dl Nord sön i scenars de vera y destruziun tla Polonia tratan la perioda dl nazism y dl fascism t'Europa. Dl’organisaziun de chësc proiet de formaziun se crüzia les organisaziuns joniles „Arbeitsgemeinschaft der Jugenddienste“ (AGJD), „Deina Trentino Alto Adige“ y „Arciragazzi“. 150 posć é preodüs por mitans y mituns dai 17 ai 25 agn por le iade dai 4 ai 10 de forá dl 2016 che portará i jogn sön n iade cun na ferata cina tla Polonia por vire n’esperiënza de analisa y reflesciun storica, olache al gnará vijité a Cracovia le gheto ebraich dla cité y la fujina de Oskar Schindler y i ciamps dla mort de Auschwitz y Birkenau.
Le start dl proiet por le 2016 é gnü presenté incö lönesc ai 21 de setëmber a Balsan dai trëi assessurs por la cultura y scora Florian Mussner, Christian Tommasini y Philipp Achammer y dai rapresentanc dles organisaziuns partezipantes. „La recordanza di avenimënc dla storia é n fautur imporant por colié la memoria storica cun la cosciënza atuala y fá a na manira che i avenimënc tragics dla Secunda Vera ne suzedes mai plü“, insciö l’assessur por la scora ladina Florian Mussner. I jogn che tolará pert al iade sará insciö ince pordadus dla memoria coletiva por costruí le dagní deboriada tl contest de na convivënza pazifica, sotlignëia l’assessur Mussner. Ince i assessurs Philipp Achammer y Christian Tommasini á recordé l’importanza dl proiet. „Deache i testimoni direc vëgn tres demanco él important da s’informé por che l’avalianza ne deventes nia desparité“, insciö Achammer. Promemoria_Auschwitz é por l’assessur provinzial Christian Tommasini n proiet essenzial che fej referimënt sides al tëmp passé co al dagní. „Le proiet é ince de valüta por formé n spirit critich di jogn en confrunt ai avenimënc de intoleranza aldedaincö“, insciö Tommasini.
Na pert fondamentala dl proiet sará les cinch incuntades de formaziun storica sön i avenimënc dla Secunda Vera Mondiala cun le focus sön la storia locala che gnará metüdes da jí dan le iade da novëmber inant. Por ti pité ai partezipanc na suraodüda prezisa sön la storia locala dl Südtirol dan, tratan y do la Secunda Vera Mondiala gnarál ince integré tl proiet la comunanza ebraica da Maran y de plü istituziuns y esperc de storia locala. Sön le program él ince döes incuntades de elaboraziun storica do le iade, öna a Toblach y l'atra a Trënt.
Plü informaziuns:
Verena Hafner (E-Mail: verena@jugenddienst.it - http://www.jugenddienst.it/, Tel. 0471 402106)
Sergio Bonagura (E-Mail: s.bonagura@arci.bz.it - www.arci.bz.it/arciragazzi/ Tel. 347 0173190)
Alessandro Huber (E-Mail: alessandro.huber@deina.it - www.deina.it Tel. 3482100583)
Videos da desciarié:
http://we.tl/AFdQMQ6mFI
Assessur Mussner: http://we.tl/m50xlZ27PZ
Assessur Achammer: http://we.tl/SLc1vtMkBm
Assessur Tommsini: http://we.tl/AZD2nH9JaY
Contignüs audio da desciarié:
Assessur Tommasini: http://we.tl/jE7FpLwwWS
Assessur Mussner: http://we.tl/3hX5JXekkZ
Assessur Achammer: http://we.tl/37u5Y17zIx
rc
