Atualità
Dì dla Scola Ladina ai 3 de setëmber a Urtijëi
Nce chëst ann vëniel metù a jì da pert dl Departimënt Educazion y Cultura Ladina l'ancunteda tradiziunela dl Dì dla Scola Ladina per i nsenianc, genitores y i sëurastanc dla scola. La tematica prinzipela de chëst ann sarà l cunzet de "home?work". L assessëur per la scola ladina Florian Mussner y l intendënt Roland Verra giaurirà ufizialmënter l ann de scola 2015/16 ai 03/09 dala 09.00 a Urtijëi.
L Departimënt Educazion y Cultura ladina urganisea uni ann dan l scumenciamënt dl ann de scola na manifestazion d'ajurnamënt y d’ancunteda che ie cun le tëmp deventà n terminn tradiziunel per funziuneres, sëurastanc y dut l personal didatich.
L assessëur per la scola ladina Florian Mussner y l intendënt dla scoles ladines Roland Verra giaurirà ufizialmënter l ann de scola nuef y purterà dant per l'ucajion n valguna reflescions sun l ann academich nuef y nfurmerà nce sun la nuviteies plu mpurtantes.
Do la paroles de salut presenterà Simon Kostner, Anna Palfrader, Rosa Complojer y Manuel Kehrer n pez de teater. Daldò arà i partezipanc la puscibltà de se dé ju te grupes sun la tematica prinzipela dla manifestazion, l cunzet de „home?work“, sun i duvieres y la ncëries de lëur di sculeies a cësa. Dl acumpaniamënt de mujiga se cruzierà i sculeies dla Scola de Mujiga de Gherdëina. La moderazion dl dì unirà fata da diretëura Maria Kostner.
L "Dì dla Scola Ladina" unirà tenì
n juebia, ai 3 de setëmber
dala 09:00
tl’Aula Magna dla Scola elementera
de Urtijëi.
USP
