Atualità
Scora ladina: Assegná indöt 12 posć a tëmp indeterminé
Nü posć tles scores elementares y trëi posć tles scores mesanes y altes: en vëndres, ai 7 de agost él gnü surandé a Balsan tla sënta dl’Intendënza ladina 12 posć de rode y 37 suplënzes anuales por i insegnanc che á ciafé l’abilitaziun y che é inseris sön les gradatöres tles scores elementares, mesanes y altes ti comuns dla Val Badia y Gherdëna. 26 é i posć de rode assegná ti ultims dui agn.
Dötadöm él sté poscibl da assegné 12 posć de rode a tëmp indeterminé por ci che reverda les scores elementares, mesanes y altes che vëgn manajades dal’Intendënza ladina da Balsan. En vëndres ai 7 de agost él gnü assegné tla sënta dl’Intendënza ladina a Balsan nü posć a tëmp indeterminé tles scores elementares dles valades ladines. De chisc é sis posć fora dl organich de dërt y trëi dal organich provinzial suplementar. Implü él gnü assegné un n post de rode tles scores mesanes che reverda l’insegnamënt de ativité fisica y dui posć tles scores altes, un de geografia y l’ater de talian. „Cun l’assegnaziun de 14 posć l’ann passé y de 12 chësc ann él sté poscibl da assegné ti ultims dui agn 26 posć de rode. Chësc ne ti dá nia ma stabilité al percurs profescional dles maestres y di maestri mo ince al sistem de formaziun ladin. Insciö él poscibl da garantí inant la continuité didatica dla scora paritetica dles valades ladines“, á dit l’assessur por la scora ladina Florian Mussner. Ince por l’intendënt dles scores ladines Roland Verra él n „gran vantaje por la scora ladina da avëi podü stabilisé na gran pert dl personal insegnant, ci che ti dá na prospetiva de laur concreta a nüsc jogn te n tëmp de malsigurtés y che ti dá plü valur ala formaziun cun vantaji dantadöt por i scolars.“
Implü él gnü surandé da pert dl’Intendënza ladina 29 suplënzes anuales tles scores elementares y 8 tles scores altes y mesanes che fej fora indöt 37 suplënzes tles scores dles valades ladines. I posć por les atres suplënzes gnará surandades ti proscimi dis diretamënter dales direziuns dles scores aladô dles gradatöres d’istitut por i insegnanc zënza abilitaziun.rc
