La Scola ladina de Fascia é jüda a vijité la scolina de Santa Cristina
Na delegaziun dla direziun dla "Scola ladina de Fascia" vijité la scolina da Santa Cristina, te Gherdëna.
En lönesc, ai 22 de aurí, á na delegaziun dla direziun dla "Scola ladina de Fascia" – cun a ce le diretur Federico Corradini y la direturia pedagogica des scolines Tatiana Soraperra – vijité la scolina da Santa Cristina, te Gherdëna. Dla delegaziun fajô pert i rapresentanc dl OLFED (Ufize Ladin por la Formaziun y la Enrescida Ditatica) y dl Ufize por la Formaziun Primara de Trënt.
Le fin prinzipal dla delegaziun fasciana ê chël da conësce plü da dlungia le conzet de educaziun linguistica che vëgn porté inant tles scolines ladines dla provinzia da Balsan che fej pert dla direziun "Ladinia".
La delegaziun é gnüda tuta ite dala direturia dles scolines, Genny Ploner, chëra che á dé inant informaziuns generales sura l’organisaziun dles scolines y deplü propostes de reflesciun sura le laur tl ciamp formatif. Do avëi presenté les carateristiches fondamentales dl’educaziun ti ultims agn, é spo la direturia jüda ite söles particolarités dl insegnamënt aldedaincö y söles prospetives por le dagní.
I ghesc é gnüs acompagná tresfora dala direturia dla scolina da Santa Cristina, Juna Moroder, che á ince presenté y splighé plü tl monü les particolarités dl conzet formatif de süa scolina. Do la teoria á i ghesc podü passé ala pratica: partis sö te dui grups, ési rodá tles classes a osservé y porvé fora personalmënter n’ativité liada al’educaziun plurilinguala. Le confrunt danter les döes delegaziuns che é gnü a se dé á rapresenté na bela ocajiun por se baraté fora esperiënzes y por jí ite söi aspec y söi vantaji che le plurilinguism bonorí, pratiché te Gherdëna y tla Val Badia, á sö l’aprendimënt di mituns.
L’incuntada te scolina s’á stlüt jö cun na presentaziun dl conzet de educaziun linguistica dles scolines ladines, portada dant dala pröma colaboradëssa dla direturia, Ingrid Mussner. Ëra á splighé sciöch’ l’imparé i lingac é lié sistematicamënter al corú dl lingaz adoré: vërt por le ladin, cöcio por le todësch y ghel por le talian, y sciöch’ la promoziun dla cosciënza fonologica di mituns y dles mitans vëgn portata inant. Presenté él gnü ince le proiet "MeLa" (Mehrsprachig Ladinisch) lauré fora aposta dal grup de laur DyME dl’université da Desproch por les scolines dla Val Badia y de Gherdëna, adöm ai intervënc preodüs sëgn che i resultac dl stüde é danman.
L’intendënta Edith Ploner, che á instëssa promoiü y tut pert tl ultim tëmp a incuntades cun la Scola ladina de Fascia é cuntënta sce al vëgn a se le dé barac de esperiënzes dantes les scolines y scores ladines de Südtirol y chëres de Fascia, che “propi tl ciamp dl plurilinguism dala scolina insö dares la poscibilité de reflesciun y da implementé la pratica cun orientamënc nüs”.
"Chësta incuntada, te chëra che i rapresentanc dles istituziuns scolastiches dla Val de Fascia y de Gerdëna é rová adöm por se confronté y se baraté fora esperiënzes, á rapresenté n momënt de valüta por renforzé la colaboraziun danter les valades ladines", á dit l’assessur provinzial por la Formaziun y Cultura ladina, Daniel Alfreider. "N contribut fondamental por stravardé y promöie le lingaz ladin vëgn zënz’ater fora bele dal pröm livel de istruziun”.
Le barat, zënz’ater interessant y ütl, é jü inant tratan marëna, che é stada n’ocajiun por se conësce damí, por imparé val’ deplü y por ponsé ciamó n iade al’organisaziun y ala pratica pedagogica, cun l’obietif – partí da trames les perts – de milioré inant y alzé sö la cualité dl’educaziun tles scolines.
Clican chiló röiun ala verjiun originala dl comunicat stampa por visualisé imajes, documënc o video che taca lapró
red
