Ciamp Urbanistica, sconanza dla contrada y dl ambiënt, agricoltöra y bosć
Trëi avocac dl’Avocatöra dla Provinzia che se dá ma jö cun l’agricoltöra y i bosć, l’urbanistica, la sconanza dla contrada y dl ambiënt rapresentëia la Provinzia dan les autorités iudiziares singoles. Tla maiú pert di caji é la Provinzia la pert acusada y ma dainré plürera instëssa zacai.
Por ci che reverda i prozedimënc dla iurisdiziun zivila nen vara dantadöt de prozedimënc liá a sanziuns aministratives, ajache al é gnü violé desposiziuns te chisc ciamps:
- salvarjina y ciacia,
- sconanza dl monn di tiers y prevenziun dl rodé intoronn de tiers,
- comerzialisaziun y igiena de alimënc da tiers,
- trafich de auti te raiuns sconá por rajuns idrogeologiches,
- pra te bosch y te raiuns degradá,
- movimënt dla tera y deponüda de material,
- mudaziun dles coltivaziuns,
- jí a fonguns,
- taié lëgns,
- jí a pié pësc,
- vacanzes sön le lüch da paur,
- bonificaziun,
- sconanza dles coltivaziuns da paur y dles ês, sciöche ince verda dles scores de lëgns da ordöra,
- sconanza dl’aria,
- proteziun cuntra la vera,
- sconanza dles eghes,
- economia dl ciomënt
- y i.i.
Les condiziuns legales é chëres dla pert I "Les sanziuns aministratives" dla lege di 24 de novëmber dl 1981, n. 689, tla verjiun en forza, y dla lege provinziala di 7 de jená dl 1977, n. 9, tla verjiun en forza ("Normes de prozedöra por l’aplicaziun dles sanziuns aministratives").
Implü se tratera de plüres d’indenisaziun, sciöche por ejëmpl porvia de inzidënc stradai che s’á porté pro porvia de salvarjina o sön strades forestales, y porvia de dagns da salvarjina a coltivaziuns agricoles y bosć. Te chisc caji é la Provinzia dagnora la pert acusada.
Dainré se tratera de plüres ziviles de n’atra sort, che alda pro le ciamp dla agricoltöra y di bosć, sciöche por ejëmpl les plüres de privac por l’usucapiun de bëgns imobii che é de proprieté de aministraziuns despartides de dërc de nuzaziun zivii.
Por ci che reverda les prozedöres de iustizia aministrativa, se tratera dantadöt de plüres cuntra les dezijiuns dla Comisciun provinziala por i mesc stlüc o liades al’interpretaziun dla lege provinziala di 28 de novëmber dl 2001, n. 17 - „Lege sön i mesc stlüc“ tla verjiun en forza, y de plüres cuntra deliberaziuns dla Junta provinziala o d’atri documënc aministratifs de organs monocratics che reverda la ciacia, i bosć, la sconanza dles plantes, la bonificaziun, sües gestiuns di dërc de nuzaziun zivii, y i.i.
Les prozedöres de iustizia penala y tributara che reverda l’agricoltöra y i bosć, l’urbanistica, la sconanza dla contrada y dla natöra é deperpo bindebó rades. Tl pröm caje é la Provinzia la pert zivila tla prozedöra penala che ciara de se fá avarëi i dagns materiai o morai o tramidui, che vëgn da reac.
