Bases iuridiches dl'autonomia

 

L'autonomia dl Südtirol se basëia sön trëi Chertes fondamentales: la Costituziun taliana, l'Acordanza de Paris y le secundo Statut d'Autonomia.

Acordanza de Paris (1946)

Ala fin dla Secunda vera mondiala romagnô le Südtirol teritore talian a condiziun che al gniss respeté complessivamënter la mendranza austriaca. Le resultat de chësta condiziun é stada l'Acordanza de Paris danter la Talia y l'Austria olache al vëgn definí les linies fondamentales dl'autonomia. Chësc tratat rapresentëia la garanzia internazionala dl'autonomia dl Südtirol.

Costituziun taliana (1948)

La sconanza dles mendranzes é fissada tl articul 6 dla Costituziun taliana. 

Secundo Statut d'autonomia (1972)

Cun le secundo Statut d'Autonomia dl 1972 á la Provinzia de Balsan ciafé le status de Regiun mo cun n'autonomia legislativa y aministrativa plü ampla respet ales competënzes de na Regiun cun n statut ordinar.

Les competënzes plü importantes

Cun le secundo Statut d'Autonomia che é jü en forza ai 20 de jená dl 1972 y che rapresentëia aldedaincö la fondamënta por la sconanza dles mendranzes tl Südtirol ti á le Stat surandé ala Provinzia de Balsan la competënza legislativa y aministrativa te zacotan de materies, partides ite ti trëi grups dles competënzes primares, secundares y terziares.

Cina ala reforma dla Costituziun dl 2001 se despartî la competënza primara, secundara y terziara dla Provinzia te seturs respetifs dá dant tassativamënter. Pro düc i atri setur ê la competënza dl Stat. Da dailó inant él gnü ot le mecanism y fat le contrar: insciö ti spetel al Stat la competënza legislativa te na ligna de materies stabilides avisa, por ejëmpl la politica estera, la defenüda, la materia fiscala, le sistem monetar, la segurëza publica, la iurisdiziun, y ala Provinzia ti él gnü atribuí la competënza legislativa por dötes les atres materies. Tl eserzize dla competënza legislativa mëss la Provinzia se möi ti limic dla Costituziun taliana, dl dërt comunitar y dles acordanzes internazionales.

I seturs olache la Provinzia á competënzes primares pó gní regolamentá cun sü provedimënc legislatifs. Al vel la limitaziun che al ne pó nia gní violé la Costituziun y i prinzips de basa dl ordinamënt iuridich talian, les oblianzes internazionales y les diretives fondamentales dles reformes economich-soziales dl Stat talian. La Provinzia á competënza primara danter ater tla toponomastica (cun le dovëi dla bilinguité tla provinzia de Balsan), la sconanza dl patrimone storich-artistich, l'urbanistica, l'artejanat, la ciacia y la pëscia, les strades, le sistem de trasport publich, l'agricoltöra y le frabiché dles scores. Competënzes legislatives primares ti speta ma ales Regiuns y ales Provinzies cun statut spezial. Al ti vëgn ince dit competënza legislativa "plëna" o "esclusiva".

Ti seturs caraterisá da na competënza secundara, a chëra che al ti vëgn ince dit "concorënta" o "partida", vëgn la Provinzia sotmetüda al respet di prinzips fondamentai che é tla legislaziun dl Stat. Chësc ó dí che le Stat regolamentëia döt ci che é sostanzial, la Provinzia le detai. La Provinzia de Balsan á competënzes secundares danter ater te chisc seturs: polizia locala, istruziun elementara y secundara, comerz, lernerat, eserzizi publics, igiena y sanité, adoranza dles eghes publiches (tut fora les gran derivaziuns por fins idroeletrics).

Le podëi legislatif dla Provinzia tles materies caraterisades da competënzes terziares vëgn limitada al'integraziun dles desposiziuns legislatives dl Stat. Te chësc cheder tomel ite les materies dl laur y dla surandada dl laur.

Assegnaziun dles competënzes
CompetënzaProvinziaStat
Cultura (biblioteches, museums, yi.i.) primara
Scolines primara
Scores secundara
Sozial (ciases de palsa, assistënza, y i.i.) primara
Strades primara
Sanité secundara
Frabiché abitatif primara
Trasport publich primara
Turism primara
Artejanat primara
Comerz primara
Industria primara
Agricoltöra primara
Proteziun zivila primara
Parcs naturai primara
Sport secundara
Imigraziun statala
Defenüda statala
Polizia statala
Iustizia statala
Finanzes (scioldi, banches) statala