Assëgn provinzial por i mituns

N sorvisc dl'aministraziun provinziala de Südtirol

Descriziun generala

L'assëgn provinzial por i mituns é n contribut por curí les spëises de mantignimënt di mituns y dles mitans sot i 18 agn y di mituns y dles mitans sura i 18 agn cun handicap.

Che che n’á nia albü le dërt de contribut straordinar una tantum de 600,00 euro, preodü dala deliberaziun dla junta n. 797/2022, pó fá domanda de "Bonus bolëtes" cina ai 31 de merz dl 2023, sce al é danman i recuisic.

Residënza:

  • 5 agn de residënza, zënza interuziun, tla provinzia de Balsan denanco dé jö la domanda. Implü pól gní presenté ince vigni atra documëntaziun da chëra che al resultëia la sojornanza permanënta por almanco 5 agn tla provinzia de Balsan. Sce la porsona che fej domanda n’á nia la residënza da cin agn, mëss l’ater genitur sön le zertificat de familia l’avëi.
  • O na residënza anagrafica storica de 15 agn tla provinzia de Balsan, y de chisc altamo un n ann zënza interuziun denanco dé jö la domanda.
  • Les zitadines y i zitadins comunitars de n ater paisc dl'UE, che n'á nia la residënza o á la residënza da manco de 5 agn tla provinzia, mëss desmostré d'avëi n raport de laur tla provinzia de Balsan, sciöche preodü dala normativa europeica 883/2004.

Mituns y porsones ecuiparades:

  • I mituns y les mitans sot i 18 agn, i mituns y les mitans sura i 18 agn cun handicap* o les porsones ecuiparades mëss vire adöm cun la porsona che fej domanda tla provinzia de Balsan y ester sön so zertificat de familia (al é stlüt fora i caji sura i confins fora sciöche preodü dala normativa europeica 883/2004).
  • Por conzede l'assëgn provinzial por i mituns vëgnel ecuiparé:
  1. ai mituns y ales mitans de mëndra eté i mituns y les mitans de mëndra eté afidá dan l’adoziun aladô dl art. 22 dla lege 184/1983, y mudaziuns suandëntes, sciöche ince i mituns y les mitans de mëndra eté afidá a tëmp plëgn dal tribunal o cun provedimënt aministratif aladô dl articul 4 dla lege 184/1983, y mudaziuns suandëntes, ince sce ai/ares n’é nia sön le zertificat de familia dla porsona che fej domanda, y i mituns y les mitans sot ghiravanza dla porsona che fej domanda sce ai vir para;
  2. ai mituns y ales mitans cun handicap* i fredesc, les sorus, i nei, les nees, i nus y les nezes de majera eté cun handicap; por chi che al é gnü paié fora ai 28 de forá dl 2022 o denant l’assëgn provinzial por i mituns aladô dl articul 16, coma 1, lëtra b) dl’injunta A dla deliberaziun dla Junta provinziala di 29 d’agost dl 2017, n. 943, y mudaziuns suandëntes.

*An conscidra porsones cun handicap les porsones invalides ziviles cun n degré d'invalidité de almanco le 74%, sciöche ince les porsones verces ziviles y les porsones surdes.

Situaziun economica:

La situaziun economica dla familia vëgn ciafada sö tres l’indicadú dla situaziun economica ecuivalënta (ISEE) dada dant tla tabela “PRESTAZIUNS ALISIRADES POR PORSONES DE MËNDRA ETÉ O FAMILIES CUN PORSONES DE MËNDRA ETÉ ” o “PRESTAZIUNS SOZIO-SANITARES POR PORSONES DE MAJERA ETÉ” a plata 2 o 3 dla detlaraziun ISEE. Le valur ISEE ne pó nia ester majer co 40.000 euro.

Competënzes linguistiches y de sozieté locala:

Les families che vëgn da Paisc nia UE (ater co le Rëgn Uní - sce cun residënza tla Talia dan i 31.12.2020 – la Svizera, la Norvegia, l’Islanda, le Liechtenstein, San Marino y le Stat dl Vatican) mëss desmostré da conësce o le talian o le todësch (livel A2) y frecuenté n curs sön tematiches che reverda la sozieté locala.

Important: sides la porsona che fej domanda che l’om/la fomena o le/la partner che vir para messará desmostré d’avëi chisc recuisic. Sce la porsona che fej domanda o l’om/la fomena o le/la partner che vir para á la zitadinanza taliana o ecuiparada ne vál nia debojëgn da desmostré d’avëi chisc recuisic.

De plü informaziuns sön Convire tl Südtirol - lingaz y sozieté locala

  • An mëss avëi la detlaraziun ISEE nöia dl 2023, sciöche preodü por la cuantificaziun dl assëgn unich y universal por i mituns y les mitans dal decret legislatif di 29 de dezëmber dl 2021, n. 230.
  • Che che fej domanda cun d’atri documënc che desmostra la permanënza stabila tl raiun provinzial da altamo 5 agn, mëss ajunté la documentaziun che proa süa permanënza stabila tl raiun.

Le valur ISEE pó gní calcolé pro n CAAF o en autonomia tres le sorvisc online dl INPS: INPS - Isee Precompilé

I sorvisc pità dai patronac y dai zëntri de assistënza fiscala é debann.

Tan dî vel pa la domanda?

L’assëgn provinzial por i mituns vëgn paié fora da merz a forá dl ann do.

Tan ciafon pa?

Valur ISEE € 0,00 – € 15.000,00

Soma al mëis por vigni möt/möta:

  • möt/möta sot i 18 agn € 70,00
  • möt/möta cun handicap sot y sura i 18 agn € 250,00

Valur ISEE  € 15.000,01 – € 40.000,00

Soma al mëis por vigni möt/möta:

  • möt/möta sot i 18 agn € 55,00
  • möt/möta cun handicap sot y sura i 18 agn € 120,00

Can vëgnel pa paié fora l'assëgn?

L’assëgn vëgn paié fora a rates vigni mëis che vëgn do, chël ó dí che la rata de messé vëgn paiada fora ala fin d’agost, chëra d’agost ala fin de setëmber y i.i.

Co vëgnel pa paié fora l'assëgn?

I paiamënc vëgn fac sön le cunt bancar intesté o cointesté ala porsona che fej domanda dada dant tla domanda.

Ci mësson pa fá tl caje de nasciüda, adoziun o afidamënt do la presentaziun dla domanda?

Na nasciüda, n’adoziun o n afidamënt de n mënder, messará gní lasciá alsavëi al’Agenzia tres la compilaziun dl formular aposta che vá debojëgn por che al vëgnes calcolé danü la soma.
Por damané dó l’integraziun por l’assëgn che an â bele damané, ne vál nia debojëgn da presenté na domanda nöia de assëgn provinzial por i mituns.

Trasparënza
Les informaziuns sön la dorada dl prozedimënt, le responsabl dl prozedimënt, le dërt de sostituziun y i mesi de sconanza legala aministrativa y iudiziara é da ciafé sön chësta plata internet.

(Sorvisc actualisá ai: 01/02/2023)

Ënt competënt

ASSE Agenzia por le svilup sozial y economich
Palazzo 12, via Canonico Michael Gamper 1, 39100 Balsan
Telefono: 0471 41 83 11 Fabiana Gabella
0471 41 83 09 Davide Giabardo
0471 41 83 14 Barbara Kaufmann
0471 41 83 03 Paola Faoro
Fax: 0471 41 83 29
E-mail: aswe.asse@provinz.bz.it
PEC: aswe.asse@pec.prov.bz.it
Website: http://asse.provincia.bz.it/

Orar por la jënt:

Lönesc, mertesc, mercui y vëndres: 9.00 - 12.00

Jöbia: 8.30 - 13.00, 14.00 - 17.30

Terminns

La domanda pó ma gní dada jö sce an á i recuisic.

  • Sce la domanda vëgn fata te 180 dis dala nasciüda, dal'adoziun o dal afidamënt dl möt/dla möta (data dl provedimënt), vëgnel paié fora retroativamënter l’assëgn pian ia dal mëis suandënt al mëis dla nasciüda, dl'adoziun o dl afidamënt o da canche an á i recuisic.
  • Sce la domanda vëgn fata do 180 dis dala nasciüda, dal'adoziun o dal afidamënt dl möt/dla möta (data dl provedimënt), vëgnel paié fora l’assëgn pian ia dal mëis do le mëis che al é gnü fat la domanda.

Por garantí la continuité dl paiamënt dl assëgn mëss la domanda gní dada jö vigni ann dal 1. de jená ai 30 de setëmber y vëgn l’assëgn vëgn paié retroativamënter da merz. Dles domandes che vëgn dades jö dedô tëgnon cunt dal mëis do che ares é gnüdes dades jö.

PRESENTAZIUN DLA DOMANDA

La domanda mëss gní dada jö pro n patronat o tres le sorvisc online eGov