Venüda de medejines tres eserzizi comerziai

Che che ô daurì n eserzize comerzial por la venüda de medejines ciafa dötes les informaziuns sön la prozedöra sciöche inće i formulars che va debojëgn sön la plata internet dl Ministêr dla sanité.
Deache l’Ofize Govern sanitar – Repartiziun Salut controlëia i eserzizi comerziai autorisà da vëne medejines, mëss düć i formulars scrić fora, ti gnì menà por conescënza inće a chësc ofize.
Implü mëssel gnì tignì cunt che tla Provinzia autonoma de Balsan mëss le farmazist responsabl/la farmazista responsabla avëi l’atestat de conescënza di lingac provinziai en referimënt al diplom de laurea aladô di articui 3 y 4 dl Decret dl Presidënt dla Republica di 26 de messè dl 1976, n. 752, y mudaziuns suandëntes o n’atra atestaziun ecuiparada. Sce le farmazist responsabl/la farmazista responsabla manćia por n cört tëmp, mëssel gnì garantì l’adoranza di lingac provinziai. Sce le farmazist responsabl/la farmazista responsabla manćia por plü co set dis mëss inće le personal dl’apoteca avëi öna dles atestaziuns nominades dessura sön la conescënza di lingac provinziai.
Al vëgn inće recordè che i eserzizi comerziai autorisà da vëne medejines mëss ti mëte a deposiziun a che che cumpra les medejines la zetola de spligaziun por todësch aladô dles modalitês stabilides dal decret ministerial di 13 d’aurì dl 2007.
Le titolar/la titolara dl eserzize comerzial mëss ti lascè alsavëi al l’Ofize Govern sanitar y al Ordinn di Farmazisć dla provinzia de Balsan, i dać dl farmazist/dla farmazista o di farmazisć/dles farmazistes che laôra te chël eserzize comerzial dal scomenciamënt de so sorvisc, y al mëss inće gnì dè dant che che é le farmazist responsabl/la farmazista responsabla. Sce chësc/chësta manćia por plü co set dis mëssel gnì comuniché che che le sostituësc. Al mëss inće gnì lascè alsavëi canche le raport de laûr se röia.