Proiec de continuità tla scolines ladines

L passage dala familia a la scolina dëssa vester per i mutons y la mutans na esperiënza positiva.

Per che chësc sibes puscibl à uni scolina n cunzet de nserimënt.

Adum cun la familia vën fat ora n nserimënt aldo de i debujëns dl mut o dla muta.

Proiet Quaky - Promozion dla cuscienza di sonns

La cuscienza di sonns ie la capazità de pensé do sun la rujeneda, ndependentamënter da si senificat y de vester boni de identifiché elemënc fonologics dla rujeneda: l sonn dla parola tla rima, la parola sciche pert de na  frasa, la silba sciche pert de na parola  y ala fin l fonem singul de na parola.

La nuvità de chësc material per la scolines y scoles elementeres ladines ie la promozion dla cuscienza di sonns te duta la trëi rujenedes provinzieles: ladin, tudësch, talian.
L program ie metù adum da truep juesc y eserzizies  mpartì ite te sies uniteies che curespuend  ala fases evolutives dla cuscienza di sonns, dant
globela y po analitica:

1. Juesc dl scuté su
2. Rimes
3. Frases y paroles
4. Silbes
5. Sonns (sonn iniziel y sonn finel)
6. Fonems dla parola

Proiet - Mi mapa de scolina

La mapa de scolina ie na racolta de lëures y esperienzes che uni mut y uni muta fej ndividualmënter ntan l ann de scolina. La mapa documentea cosses che l mut/la muta sa y dij, cie che ël/ëila cunësc bele y cosses che ël/ëila mpëra. Nsci iel na documentazion dla capaziteies y dla cumpetënzes che uniun/uniuna à. Tres l lëur cun la mapa, giata l mparé y l lëur te scolina n autra mpurtanza. L mut/a muta mpëra a vester cusciënt/cusciënta de dut cie che ël/ëila sa, fej y mpëra.
La mapa de scolina ie n arichimënt per l svilup dl´ indentità de uni mut y uni muta y la ie dantaldut nce na puscibltà de dialog danter mut/muta, educadëura pedagogica y familia.