Atualità
Isté 2021: De plü linies dl trasport publich ince tles valades ladines
Tratan la sajiun da d’isté vëgnel amplié les linies publiches dles corieres, dantadöt de chëres turistiches. De plü é ince les novités tles valades ladines.
Dan da püch él gnü ativé de plü linies dl trasport publich por la sajiun da d’isté. Al reverda dantadöt linies che porta a destinaziuns turistiches. “Cun le potenziamënt dles linies turistiches d’isté él nosc obietif che les porsones s’anüzes deplü dl sorvisc publich y manco dl auto por se möie. Al é ince n ampliamënt dl’oferta di coliamënc dles ferates che röia a Balsan da de plü perts dla Talia”, dij l’assessur por la mobilité Daniel Alfreider. L’obietif é tres de plü chël che al vëgnes adoré les corieres, les ferates y la roda por se möie y por dé n contribut ala sconanza dl ambiënt y por smendrí le trafich, insciö Alfreider.
Porchël él la Repartiziun Mobilité che á amplié le sorvisc dl trasport publich te döta la Provinzia. „Por l’atuaziun dl orar él gnü tut en conscidraziun i coliamënc cun d’atres linies che porta ales destinaziuns turistiches plü importantes”, spliga Heinz Dellago, n colaboradú tecnich dla Repartiziun Mobilité
Dessot les novités por les valades ladines. L’orar atual é da ciafé sön suedtirolmubilta.info. Sce an rode cun i mesi dl trasport publich él nezesciar da se curí bocia y nes. Informaziuns monüdes él da ciafé clican chiló.
Gherdëna
La linia 350 Balsan/Porsenú – Gherdëna vëgn dai 20 de jügn inant arlungiada da Sëlva cina Plan de Gralba, olache an pó tó inant les linies di Jus. Les corieres da d’isté 357 Sëlva y 358 Santa Cristina é atives dai 17 de jügn inant cun n percurs nü. La linia 172 Urtijëi – Furnadoia de Munt de Suc vëgn potenziada cun corieres en pert vigni mes’ora y arlungiada da Ciastel cina sö dala furnadoia de Munt de Suc, cina ai 17 d’otober.
Val Badia
La linia 339 danter San Pire Funes – Börz – Antermëia é ativa dai 23 de jügn inant. La novité é che les corieres passa cun n interval de n’ora cun na palsa da misdé. La linia 462 Bornech – Al Plan – Pederü pëia ia ai 17 de jügn, la novité é che les corieres pëia ia da Bornech. Cina ai 26 de setëmber sará ativa la linia 362 danter Al Plan y Furcia.
La linia 465 Corvara – Falzares é ativa cina ai 3 d’otober.
Dai 20 de jügn inant é gnüda potenziada la linia 471 Gherdëna – Ju de Sela – Cianacëi/Pordú. La linia 472 Corvara – Reba – Pordú é ativa cina ai 17 d’otober, la linia 473 Gherdëna – Val Badia cina ai 10 d’otober.
USP/USP
