Atualità

Entrada nöia dla Val Badia: mëteman di laurs cun le 2019

Cun la sentënza dl Consëi de Stat é i laurs de costruziun por l’entrada dla Val Badia gnüs assegná al’assoziaziun temporanea de impreses cun a ce Strabag AG.

Cun l'entrada nöia tla Val Badia dessel gní sposté le trafich fora dal zënter dl Comun de San Laurënz y alisiré le trafich dantadöt tles periodes cun tröc passaji de veicui (Foto: Repartiziun Infrastrotöres)

Te na pröma dezijiun é i laurs de costruziun por l’entrada nöia dla Val Badia gnüs assegná tres n apalt al’assoziaziun temporanea de impreses E.MA.PRI.CE. AG. Cinch d’atres assoziaziuns temporanees de impreses á tut pert ala bandida de concurs. Do n recurs da pert de d’atres assoziaziuns temporanees á le Consëi de Stat de Roma tut la dezijiun sön l’apalt dl’opera. Do la sentënza da pert dl Consëi de Stat Nr. 5919/2018 vëgn le recurs da pert dl’assoziaziun temporanea de impreses cun a ce STRABAG AG azeté y al ti vëgn surandé de conseguënza l’apalt ala Strabag AG cun l’esclujiun dla davagnadëssa E.Ma.Pri.Ce y ince dl’assoziaziun temporanea de impreses rovada secunda, la Oberosler Cav. Pietro G.m.b.H. “Do chësta dezijiun importanta sarál sëgn poscibl da mëte man tosc cun i laurs, plü dessigü cun le mëteman dl ann nü 2019 “, dij l’assessur por les infrastrotöres.

La trassa reverda l’entrada nöia tla Val Badia dlungia le Ciastel Badia cun sortides y entrades nöies te dötes les direziuns. La strada nöia passará sura le lech artifizial ia y é gnüda planificada en acordanza cun le Comun de San Laurënz y i esperc dla sconanza dla natöra, dla contrada y di bëgns culturai. Indöt gnarál investí tla infrastrotöra stradala nöia söporjö 75 miliuns de euro, la soma a desposiziun dl’aministraziun (espropriaziuns de terac, cutes,….) é bele calcolada lapró.

“Cun l’entrada nöia dla Val Badia, che sará zënza incrujades, podará le flus dl trafich de pendolars y turisć gní manajé damí. Al gnará de conseguënza alisiré le trafich a San Laurënz cun vantaji por la cualité de vita dla jënt sön le post”, á dit l’assessur por les infrastrotöres.

USP

Galaria dales fotografies