Atualità

Statala dl Prener, devers la proibiziun da passé por i camions

Proibiziun da passé por i camions che adora la strada statala dl Prener por ti sciampé al paiamënt dl'autostrada che sará plü cer. De plü mosöres preodüdes.

Cun le daz de passaje por i camions sön la A22 él la Provinzia che ó smendrí le numer di camions che fej vigni ann la trata dl Prener por trasporté marcianzies (Foto USP/Daniel Rabanser)

Mëte sö, pian ia dal 2019 inant, la proibiziun da passé por i camions che ó ti sciamé al paiamënt dl'autostrada adoran la statala dl Prener por passé fora por le Südtirol: chësc é le travert dla dezijiun tuta incö (ai 9 d'otober) dala Junta provinziala. La dezijiun dla Junta provinziala é liada ala surandada dla conzesciun autostradala por l’A22 che dess se gní a se le dé por la fin de novëmber do l'incuntada cun le Minister di trasporc y dles infrastrotöres. Tres la conzesciun él ince preodü l'introduziun dl daz de passaje, chël ó dí dac plü alc por i camions y le trasport de marcianzies posoces. L'obietif é chël da smendrí le trafich sön d'atres trates y nia chëra dl Prener che atualmënter é dër a bunmarcé. Tres en stüde dla Provinzia él preodü che i camions, impede co tó l'autostrada, vais inant sön la statala dl Prener cun conseguënzes negatives por i zitadins y le trafich en general. Porchël él sté la Junta che á tut la dezijiun da intergní cun mosöres che prevëiga la poscibilité da proibí ai camions da zircolé sön la statala dl Prener che ai le fej por ne messëi nia paié le daz.

„Al ne mancia nia tröp por stlü jö la conzesciun autostradala – sotlignëia le presidënt dla Provinzia – al se trata de na tratativa lungia y complicada, olache i un tres metü al pröm post la chestiun di aspec dl ambiënt. Al ne sará nia poscibl da ponsé che le trafich posoch vais dal’autostrada sön la strada statala.” Por consintí al proprietar dla strada, te chësc caje la Provinzia de Balsan, da atué na proibiziun permanënta dl passaje dl trafich posoch él debojëgn de na mudaziun al codesc dla strada. “Sön chësc punt un ince ciafé n ok politich da pert dl Minister dl trasport – dij le presidënt – mo i tëmps sará bindebo lunc. Insciö un tut la dezijiun da arjigné ca mosöres alternatives, sciöche ince le Land Tirol fej bele, a na manira che i sun arjigná ca por la situaziun cun na proibiziun dl passaje di camions sön la SS12 apëna che al gnará apliché n daz plü alt sön l’autostrada.”

La normativa prevëiga la poscibilité dl proprietar dla strada da fá detlaré proibiziuns de passaje de dorada cörta por de plü gaujies: dala segurëza publica ala segurëza stradala, da chestiuns dl militer ala sconanza dla sanité di zitadins. Y propri la sanité di zitadins foss la gaujia por proibí le passaje di camions che passa por le Südtirol sön la SS12.

I aspec tecnics y aministratifs dla chestiun, che ó bloché söl nasce le problem dl trafich devié, gnará aprofondis da n grup de laur coordiné dal Secreter general dla Provinzia y formé dal personal dirigënt dl'Agenzia ambiënt, dl Sorvisc strades y dales Repartiziuns Mobilité y Sanité. La SS12 pó sambëgn gní adorada inant zënza limic por i trasporc “daite” dal teritore dl Südtirol, o dai camions che pëia ia dal Südtirol o röia te na localité dl Südtirol.

 

USP

Galaria dales fotografies