Atualità
Pröma infanzia, alisiraziuns por l'assistënza defora dla Provinzia
Ok dla Junta por les alisiraziuns tarifares por l'assistënza di mituns sot i trëi agn defora dla provinzia. Mosöra por ciafé na balanza danter laur y familia.
Les families che á la residënza tla Provinzia de Balsan che s’anüza de strotöres por l'assistënza de sü mituns sot i trëi agn tles regiuns vijines, pó ciafé alisiraziuns cun l'aplicaziun dles tarifes che ti corespogn a chëres aplicades tl Südtirol, chël ó dí aladô dl davagn na tarifa danter 0,90 y 3,65 euro al’ora. Chësc é ci che la Junta á fat fora incö (19 de jügn) sön proposta dl’assessuria por la familia Waltraud Deeg. "Chësta prestaziun implü é dantadöt importanta por les families di comuns sön le confin cun le Trentin, le Tirol y la Svizera - dij la Deeg – ajache ara porta pro a ciafé na balanza danter familia y laur ince te situaziuns straordinaries, olache ara ne vá propi nia da mëte i mituns te na strotöra tl comun de residënza".
Les families interessades mëss, denanco s’anuzé de chësta poscibilité, fá domanda tl Comun de residënza, che messará surantó les somes dles alisiraziuns tarifares. Sce i cosć standarg d’assistënza é maius co chi aplicá tla provinzia de Balsan, mëss les families paié la desfarënza. Ala medema moda podará ince les families dles regiuns vijines mëte sü mituns cun manco de trëi agn te strotöres dl Südtirol. Chësc pó gní fat sce al é ciamó posć lëdi y sce al n’é nia plü mituns cun la residënza sön la lista de aspeta. Te chësc caje mëss les families indere paié döta la soma.
USP
