Atualità

Contribuc ai pendolars, domandes cina ai 16 d‘aurí

Les domandes de contribut ai pendolars pó dai 16 d’aurí inant ma plü gní presentades online cun le SPID o la Cherta di sorvisc.

Ince les domandes de contribut di pendolars por les spëises de iade pó ma gní fates online. Aladô dles desposiziuns statales ti rovarán ma plü pormez tres le SPID (“Sportello Pubblico Identità Digitale) a tres de plü sorvisc y l’assessur provinzial por la mobilité Florian Mussner spliga che al é gnü sposté le termo de presentaziun dles domandes “propi por ti dé le tëmp ai zitadins da ativé le SPID”. Les domandes por le 2017 pó gní fates online al Ofize Trasport de porsones dai 16 d’aurí ai 29 de jügn dl 2018. I criters de conzesciun ne é nia gnüs mudá.

Al pó fá domanda le personal dependënt che mëss se sposté por rajuns de laur da ciasa cina al post de laur, mëss aspeté ai mesi de trasport publich dötadöm almanco 60 menüc y vá a lauré almanco 120 dis al ann; implü mëss la trassa da fá vigni de ester de passa 18 chilometri y ne ester nia sön öna dles linies dl trasport publich olache al passa almanco vigni mesora n meso. Implü ne pón nia davagné deplü co 50 mile euro lordo al ann.

Dl 2017 él gnü dé jö 4022 domandes; por 3800 é l’arat sté positif y al vëgn paié fora dötaurela les somes por n investimënt complessif de 2,4 miliuns de euro. “Le contribut ai pendolars por les spëises de iade é ponsé dantadöt por chi che mëss fá trasses lunges y ne pó nia adoré i mesi publics por jí al laur”, spliga Mussner. Por de plü informaziuns sön le contribut ai pendolars pón ciaré do sön la plata internet dla Provinzia o contaté tres e-mail l’Ofize Trasport de porsones. Informaziuns sön le SPID y le sorvisc online dl’aministraziun publica tl Südtirol ciafon sön le portal nazional dl SPID, o tres le portal dla Provinzia myCivis.

USP