Atualità

Teater musical “Ujöp da Oies” – Alfreider: "Proiet cultural important"

Tla bela culissa de Oies, é düt arjigné ca por le teater musical "Ujöp da Oies" che ará süa premiera chësc vëndres. Alfreider ó sotrissé l’importanza che chësc proiet á por la cultura ladina.

Do dui agn de programaziun, ará süa premiera chësc vëndres, dales 21:00 le teater musical "Ujöp da Oies" tla culissa dla vila de Oies. Le toch teatral, basé söles funtanes storiches y les documentaziuns leterares, cunta la vita y les operes dl miscionar Ujöp Freinademetz. Ujöp é sté na porsona de fede, de pesc y de dialogh.

Por l’assessur por la scora y cultura ladina, Daniel Alfreider, rapresentëia chësc n bel vare inant por la cultura ladina. "Ara se trata de n proiet artistich y cultural dër imponënt, che á metü man tl 2020 sön scomenciadia dla Müsiga de Badia y dl Sorvisc ai Jogn Val Badia, y che á spo descedé tres plü entusiasm, interess y partezipaziun da pert dla popolaziun de döta la valada", dij Alfreider. "I oress dandadüt me complimenté cun i organisadus dl teater musical. Avëi ponsé y metü man da programé bele dan da dui agn n proiet tan ambizius á porté de gragn früc: 140 porsones sará da aldí y odëi sön paladina, danter musicontri (70) jobleri y jobleres (50) y corisc (20)", insciö Alfreider.

L’assessur por la cultura ladina á spo sotligné: "Al ne ê nia saurí imaginé da ester bugn de trá ite tan de porsones, te n proiet cultural. Düt é gnü manajé cun gran competënza y profescionalité. Y dandadüt cun gran idealism, entusiam y convinziun. Chësc é n sëgn che la figüra de sant Ujöp á tröp da dí, a nosta jënt ladina, y che al é vöia y interess da tó pert ala vita culturala de valada". Alfreider oress invié dotes les ladines y i ladins, mo nia ma la jënt ladina, da jí a ti ciaré a chësc teater.

Sot al sit: https://www.musicaloies.it/ pón ciafé dötes les informaziuns sura le proiet y ailó él poscibil prenoté les chertes por i spetacui.


Clican chiló röiun ala verjiun originala dl comunicat stampa por visualisé imajes, documënc o video che taca lapró

USP/red/san