Atualità

Di internazionel dla rujeneda dl’oma: mparé la rujenedes fajan damat

Co ti dijen pa ala bales per arab? L Servisc de coordinamënt per l’integrazion à metù a jì n juech de bingo te set rujenedes per mutons y families n ucajion dl di dla rujeneda dl’oma ai 21 de fauré.

di internazionel dla rujeneda dl’oma ie unì metù su dal’Unesco per sustenì la pluralità linguistica y culturela y l plurilinguism sciche sëni de identità culturela y sciche streda per capì y respeté l proscimo. L Servisc de coordinamënt per l’integrazion tol chësc di sciche n’ucajion per ti jì permez ala set rujenedes che vën rujenedes l plu suvënz te Südtirol (tudësch, talian, ladin, arab, albanesc y urdu) tres n juech de bingo ulache l vën reprejentedes situazions da uni di, tradizions, spëisa tipica, tieres y plantes dl post.

Fé damat cun set rujenedes

Co ti dijen pa ai scarpëc per albanesc? Y co cëla pa ora la scritura araba? I sculeies y la sculées dla scola elementera giata la resposta a chësta dumandes fajan damat a bingo. Nscila iel mesun mparé a cunëscer la natura y cultura dl Südtirol, nsci sciche rujenedes y scritures mo scunesciudes, a na maniera plajëula. De gra ala istruzions te plu rujenedes possa i mutons y la mutans fé damat sibe a scola che a cësa, l juech possa unì mprestà ora tla biblioteches dl luech o tla biblioteches de scola.

L luech da paur, la muntaniola, l medel, l gurmel y l lën da Nadel ie mé n valgun ejëmpli per dessënies fac dala ilustradëura Evi Gasser, che à nce dessenià l liber "Mein kleines Südtirol Buch". Ëila ie stata bona de dessenië situazions da uni di te Südtirol a na maniera scëmpla y adateda ai plu pitli, cun truep culëures.

Cater partner te chësc proiet

L proiet ie unì metù a jì dal Servisc de coordinamënt per l’integrazion n cunlaurazion cun l Ufize Biblioteches y letura dla Repartizion Cultura tudëscia, l Ufize Furmazion permanënta dla Repartizion Cultura taliana y cun l’Unità Migrazion dla Repartizion pedagogica. L fej pert dl proiet "#multilingual".

Plu informazions pudëis abiné sota www.provinz.bz.it/integration/unser-bingo-spiel.


Clican chiló röiun ala verjiun originala dl comunicat stampa por visualisé imajes, documënc o video che taca lapró

USP/red/jw/nst