Atualità
28 partezipantes y partezipanc dl Südtirol tol pert ai Jüc olimpics
La Junta provinziala ti fej les mius aodanzes ales atletes y ai atlec dl Südtirol che tolará pert ai Jüc olimpics y paralimpics da d'invern a Beijing 2022.
Les prömes atletes y i pröms atlec é bele sön pista da chëstes ores, mo la daurida ofiziala di Jüc olimpics da d’invern de Beijing 2022 gnará a se le dé ai 4 de jená cun la zerimonia de daurida tradizionala. Al sará indöt 28 atletes y atlec dl Südtirol che tolará pert a chësta ediziun di Jüc olimpics dai 4 ai 20 de forá. Indöt é la delegaziun dla Talia de 118 atletes y atlec partis sö te 20 disciplines desfarëntes. Dl 2018 a Pyeonchang á i rapresentanc dl Südtirol arjunt indöt döes medaies de brom tl biathlon cun Dominik Windisch (10 chilometri sprint) y tla stafëta di ëi y ëres cun Wierer, Hofer y Windisch adöm a Vittozzi.
I 28 partezipanc y partezipantes che tolará pert ai Jüc olimpics de Beijing 2022 sará partis sö te 9 disciplines desfarëntes: biathlon, bob, combinada nordica, freestyle, salt cun i schi, schi alpin, liösa, brëia y jadiné de figöra.
Le presidënt dla Provinzia Arno Kompatscher sotrissëia che ince sce ti agn passá s’ál amplié le numer di atlec sudtirolesc a livel mondial ti sporc da d’isté – por ejëmpl cun Sinner tl tennis y cun Giannelli tl volley-ball, resta les raisc storiches coliades ales disciplines da d’invern: “I oress ti fá les mius aodanzes a dötes les atletes y a düc i atlec che tol pert ai Jüc olimpics. La prësenza ai Jüc olimpics é eniann bele n travert de gran morvëia, sce i ponsun ala situaziun dla pandemia, che á caraterisé la preparaziun di atlec y dles atletes, dl personal tecnich y d’alenamënt te chisc agn y che á fat dl döt por podëi tó pert.”
Le presidënt Kompatscher recorda che le valur dl sport da d’invern é dër alt tla Provinzia de Balsan: “I sperun che i resultac arjunc pois dé sodesfaziuns, contentëzes y medaies, mo i savun che al é da conscidré n gröm de faturs che pó ince influenzé negativamënter les prestaziuns sportives. Da nosta pert ciarunse da garantí le plü gran sostëgn poscibl y i sun sigü che döta la jënt dl Südtirol fajará le tifo por nüsc atlec y nostes atletes por ti dé na sbürla implü tratan les competiziuns a Beijing. A inom de döta la Junta provinziala y dla jënt de nosta provinzia ti feji les mius adodanzes ai atlec y ales atletes di Jüc olimpics y paralimpics: ince sce val’ resultat ne sará nia chël aspeté, sunsi sigü che i arëis na funziun de ejëmpl por la jonëza y sarëis ambasciadus di valurs de nosta tera fora por le monn.”
Dai 4 ai 13 de merz gnarál metü da jí i Jüc paralimpics da d'invern 2022. Al sará indöt set atlec dl Südtirol che tolará pert y implü trëi atlec dl Trentin scric ite tl Grup sportif dles porsones cun handicap dl Südtirol che fej pert dla scuadra nazionala de Para Ice Hockey.
La lista cun dötes les atletes y düc i atlec che tol pert ai Jüc olimpics y paralimpics é da ciafé sön la plata internet aposta dla Provinzia.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/mb
