Atualità
Dala Junta: André Comploi nominé tl Consëi dl’Université da Balsan
André Comploi y Antonio Lampis é i dui componënc nüs dl Consëi dl’Université nominé incö (25 de jená) dala Junta. Al é gnü confermé Tappeiner y Oberrauch.
Cater di set comëmbri dl Consëi dla Université Lëdia de Balsan vëgn nominá dala Junta. Incö ai 25 de jená á la Junta provinziala nominé sön proposta dl presidënt dla Provinzia y assessur por l’Inovaziun, Archirida, Université y Museums, Arno Kompatscher i cater comëmbri. Al se trata dla biologa y presidënta dla Université de Balsan, Ulrike Tappeiner, dl imprenditur Harald Oberrauch, dl diretur dl Departimënt Cultura taliana, ambiënt y energia dla Provinzia y iurist Antonio Lampis y dl espert de musiga, teater, film y media ladins y coordinadú artistich dl Teater dla Scala de Milan André Comploi. Te süa pröma sentada nominará le Consëi la presidënta/le presidënt y la vizepresidënta/le vizepresidënt.
Cater comëmbri nominá dala Provinzia
“Cun Ulrike Tappeiner y Harald Oberrauch y adöm ai dui comëmbri nüs Antonio Lampis y André Comploi él la Provinzia che á nominé porsones de gran competënza che dará n contribut important por le svilup dl’Université”, á dit le presidënt Kompatscher. Le Consëi ne tól nia ma cunt dla portignënza linguistica, mo ince di ciamps plü desvalis dl savëi y dl’ativité culturala y de formaziun. Al fej pert ince dl Consëi dl’Université le retur Paolo Lugli y n rapresentant dl Senat Academich y un di studënc. Le Consëi nü gnará istituí por i proscims cater agn.
I compic dl Consëi dl’Université
Le Consëi dl’Université é le organ de direziun plü important dl’Université, al stabilësc les linees de svilup y i plans de plü agn por l’insegnamënt y l’archirida. Implü él so compit da definí le program dles ativités y la proposta dl bilanz dl’Université y da aprové les convenziuns. Do l’aldiziun dl Senat academich él l’Univesité che tól la dezijiun sön la stlüta o daurida dles unités d’organisaziun academiches, dles facoltés y di percursc de stüdi. Do l’aldiziun dl Consëi de facolté él le Consëi dl’Université che nominëia i dozënc y do l’aldiziun dl Senat ince le retur o la returia y i vize.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/jw/sf
