Atualità
Program de svilup comunal: de plü incuntades cun i Comuns
“Te set vari devers dl Program de svilup comunal” á inom la linia de incuntades organisada dal’assessuria Hochgruber Kuenzer cun i Comuns. Pröma sentada incö (12 de otober) a Funes.
Indöt 73 Comuns á dé süa adejiun ala scomenciadia organisada dal’assessuria provinziala Maria Hochgruber Kuenzer y che reverda la linia de incuntades d’informaziun por ti fá la proposta ai Comuns da sostigní l’elaboraziun efiziënta dl stromënt de planificaziun nü, le Program de svilup comunal. La pröma incuntada é incö ai 12 d'otober a Funes. Tratan la sentada ti gnarál presenté ai aconsiadus y ales aconsiadësses la forma de elaboraziun dl Program de svilup comunal. Le Consëi comunal ará n rode de gran importanza tratan le prozes de planificaziun.
La lege provinziala teritore y contrada é jüda en forza y ti á insciö dé maius competënzes y responsabilités ai comuns. Na pert de chësta autonomia é la planificaziun dl svilup comunal y porchël él sëgn vigni comun che mëss lauré fora le Program de svilup comunal cun l’aiüt de espertes y esperc dl setur y adöm ala popolaziun.
La sfida é chëra da analisé la situaziun atuala de vigni Comun y da fá prospetives por le dagní di proscims agn. “Al sará nezesciar da tó dezijiuns strategiches che reverda i proscims agn mo ince da ponsé plü inant por le bëgn dles zitadines y di zitadins y che ará na conseguënza direta sön la cualité de vita ti paisc”, sotlignëia l’assessuria Hochgruber Kuenzer. Al gnará metü sön mësa chestiuns che reverda la pert sozioeconomica dl Comun, le paesaje, la mobilité, l’azessibilité, le turism, l’analisa de frabiches ötes y de zones d’urbanisaziun nia adorades.
I 116 Comuns dl Südtirol é damaná da lauré fora le Plan de svilup comunal cina l’ann 2023 adöm ai esperc dl setur y cun la partezipaziun dla popolaziun. Le codejel "I Comuns proietëia so dagní" spliga i punc prinzipai dl conzet “Te set vari devers dl Program de svilup comunal”. I zitadins y les zitadines dess ince tó pert ativamënter a chësc prozes de svilup dl comun te chël che ai vir.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/sa
