Atualità
Vijita ales scores de Gherdëna, Alfreider: “Deboriada fat le poscibl”
Vijites da pert dl assessur Alfreider y dl’intendënta Ploner tla scora mesana, tl lizeum d’ert y tla scora profescionala por l’artejanat artistich y tl Istitut tecnich economich de Urtijëi.
La surandada dl terzo pest dl Trofé dl lëgn da en chësc ann ala scora mesana „Ujep Antone Vian“ de Urtijëi, l’ejam de maturité y les particolarites de chësc ann de scora tratan la pandemia é stá i temesc dla vijita dl assessur por la formaziun ladina Daniel Alfreider y dl’Intendënta ladina Edith Ploner tla scora mesana de Urtijëi, tl Lizeum d’ert y scora profescinala por l’artejanat artistich “Cademia” y tl Istitut tecnich economich “Raetia” a Urtijëi.
Desfides da superé deboriada tl ann scolastich particolar dl coronavirus
L’assessur por les scores ladines á sotrissé la particolarité de chësc ann de scora tratan la pandemia: ”Al é sté n ann cun tröpes desfides y porchël oressi rengrazie düc y dötes che che á daidé da garantí l’insegnamënt. Sides les direturies y i direturs, co ince i insegnanc y les insegnantes á porvé da mantigní n bun contact cun les families por acompagné le miú che ara jô les mitans y i mituns, les jones y i jogn sön so tru formatif”. Deboriada unse ciaré da fá le poscibl da chësta situaziun, insciö l’assessur.
L’intendënta Edith Poner á ince recordé che al n’é nia sté n ann saurí por les scolares y i scolars. “Al è dër important da capí che nia düc i mituns y i jogn á podü vire chësc tëmp te na maniera positiva y che al é porchël desfarënzies che mëss gní tutes en conscidraziun ince pro la valutaziun finala”.
La terza A dla scora mesana á davagné le terzo pest dl Trofé dl lëgn “Holztrophy”
N’ocajiun de premiaziun é gnüda a se le dé tratan la vijita ala scora mesana de Urtijëi. L’assessur á surandé en presënza dla direturia Maria Kostner ala terza classa seziun A dla scora mesana por le terzo pest dl Trofé dl lëgn por so proiet “Tublà Wall”. La classa á fat para ala scomenciadia dl Trofé de lëgn por les scores mesanes de ProRamus, n proiet organisé dala organisaziun IDM por sotrissé l’importanza dl lëgn. Dantadöt por ci che reverda la lauraziun dl lignan él te Gherdëna na gran tradiziun, á dit Alfreider che á laldé la scomenciadia.
Cademia y Raetia: Candidates y candidac se arjigna ai ejams de contlujiun
Adöm ales direturies Maria Teresa Mussner y Monica Moroder á i suranstanc scolastics vijité de plü classes dla scora d’ert y dla scora profescionala por l’artejanat artistich Caemdia y dl Istitut Tecnich Economich Raetia. Al é gnü a se le dé de plü conversaziuns cun les candidates y i candidac che s’arjigna ca al Ejam de Stat. L’assessur y l’intendënta á ince vijité n curs de spezialisaziun por adultes y adulc da de plü paisc.
USP/rc/san
Galaria dales fotografies
