Atualità
Mara Nemela é la direturia nöia dla Fondaziun Dolomites UNESCO
Mara Nemela, ladina de Fascia, é la direturia nöia dla Fondaziun Dolomites UNESCO. Ara é gnüda nominada inier (3 de ma) a Belun dal Consëi d’Aministraziun.
Do les dimisciuns da l’ann passé de Marcella Morandini, saral indô na ëra a ce dla Fondaziun Dolomites UNESCO. Le Consëi d’Aministraziun dla Fondaziun, rové adöm inier (3 de ma), á chirí fora Mara Nemela sciöche direturia nöia dla Fondaziun Dolomites UNESCO, danter les trëi candidates che â superé la seleziun. “I ún chirí fora la miú candidata, ince sce al n’é nia sté saurí. Les trëi candidates che ti é gnüdes presentades al Consëi d’Aministraziun â dötes n profil da n livel dër alt”, á dit l’assessuria provinziala Maria Hochgruber Kuenzer , che á ince sotrissé sciöche la gran partezipaziun ala seleziun y le livel dles candidates y di candidac é la desmostraziun dl prestisc che la Fondaziun Dolomites UNESCO á arjunt te chisc agn.
Dolomites, contrada da stravardé y da dé inant ales proscimes generaziuns
Mara Nemela, ladina de Fascia, é stada cina sëgn responsabla dl ofize tecnich dl Comun general de Fascia y coordinadëssa dla “Rete delle Riserve della Val di Fassa”. Por so profil profescional ampl y interdisciplinar, por süa conoscënza sota dl teritore y dla cultura dles Dolomites, adöm cun na gran competënza tl dialogh y tla soluziun di conflic, á le Consëi d’Aministraziun dla Fondaziun chirí fora ëra. “Lauré por la Fondaziun ó dí por me se mëte al sorvisc de n sistem teritorial comples, ciaran da favorí le dialogh y le confrunt”, á dit Mara Nemela, recordan che sciöche düc chi che é chersciüs sö tles Dolomites, ára ince ëra n sentimënt natural da odëi le patrimone y l’arpejun dl teritore sciöche bëgns dla coletivité da coltivé, stravardé y dé inant ales generaziuns che vëgn do.
Renforzé la cooperaziun interregionala
“Le reconoscimënt UNESCO é na dezijiun y n impëgn por la conservaziun ativa, al ne pó nia ma gní tut ca sciöche stromënt por la promoziun turistica”, á recordé l’assessuria Hochgruber Kuenzer, che á ince sotrissé la nezescité dl’impëgn, por les generaziuns che vëgn do, da mantigní vi le sentimënt de responsabilité y valorisaziun dl liam danter le contest ambiental y les comunites locales. “I sun sigüda che al sides debojëgn da renforzé ciamó deplü la cooperaziun interregionala, mo ince chëra te nostes provinzies y regiuns instësses, ince por chi che reverda les chestiuns dla mobilité y dla gestiun di raiuns cun tröc vijitadus sciöche chël dles trëi pizes de Lavarëi“, á dit l’assessuria.
USP/sa
