Atualità
#AiücCovid por 500 miliuns de euro por impreses y families
Cun n pachet de mosöres ajuntif de indöt 500 miliuns de euro sostëgn la Junta provinziala impreses y families te chësc momënt de crisa.
La Junta provinziala á realisé n pachet complessif nü cun aiüc Covid de 500 miliuns de euro por smendrí i efec negatifs dla crisa atuala, che á metü man cun la defujiun dl coronavirus. Te süa sentada dai 2 de merz á la Junta provinziala stabilí n pachet de mosöres che reverda families, profescionisć lëdi y impreses por garantí na basa economica stabila. Incö á le presidënt dla Provinzia Arno Kompatscher, adöm cun döta la Junta, presenté les mosöres te na conferënza stampa.
Smendrí i danns soziai y economics
La pandemia dl coronavirus á porté a de gran dificoltés por porsones, families, lauranc y impreses, á dit le presidënt Kompatscher. “Al é sëgn important da sostigní les families y impreses por che ares pois paié les spëises. Porchël á la Junta cherié mosöres de aiüt finanziar complementares ales mosöres statales y ai aiüc bele aprová a livel provinzial”, á dit Kompatscher. N per de mosöres jará en forza atira, por d’atres él ciamó da cherié la basa iuridica tl Consëi provinzial y tla Junta. Chësc pachet de mosöres é le secundo pachet realisé tratan la perioda dl coronavirus do la pröma seria de mosöres dl ann passé #Ipiunindoia.
Aiüc por l’economia
Le vizepresidënt ladin dla Provinzia Daniel Alfreider á sotligné tratan so intervënt che al é n momënt de dificoltés sides por les impreses co por les families y che la Junta mët a desposiziun aiüc por smendrí les conseguënzes negatives de chësta crisa. “Cun la mancianza dla sajiun da d’inver él tomé demez n motor important de nosta economia dles valades ladines y cun chësc pachet él la Junta che dá n contribut. Al é indere fondamental che le laur pois indô pié ia sciöche denant”, á dit Alfreider. Le vizepresidënt talian dla Provinzia Giuliano Vettorato á damané da tigní ite les regoles y da tigní adöm por podëi tosc rové fora da chësta crisa.
Mosöres por 500 miliuns te düc i seturs
Tl pachet él laite aiüc sides por porsones singules co ince families por indöt 55 miliuns de euro en ajunta ales mosöres soziales atuales. Por impreses él preodü contribuc zënza retüda por 100 miliuns de euro y contribuc por cosć fisc por indöt 280 miliuns de euro.
Implü él preodü n fond cun mosöres ajuntives por 65 miliuns de euro. 100 miliuns gnará metüs a desposiziun por la sospenjiun dla retüda dles rates di imprësć. Implü vëgnel metü a desposiziun 150 miliuns por sburlé les cutes comunales.
Mosöres tl sozial: Sostëgn ales families
Por la vizepresidënta y assessuria provinziala por le sozial Waltraud Deeg ampliëia les mosöres dl pachet #AiücCovid le numer de porsones che podará damané da ciafé n sostëgn provinzial porvia dl Covid 19. N aiüt implü é por l’assessuria l’aumënt dl import por l’aiüt de emergënza da 900 a indöt 1700 euro al mëis che garantësc insciö n sostëgn finanziar plü ampl por les families. “La rëi soziala dl Südtirol á desmostré so valur tratan la pandemia y á sostigní tröpes families. Cun les novités presentades incö sará i aiüc ciamó plü ampli”, á dit Deeg. Al resta varëntes les formes de sostëgn de aiüt sozial che an pó damané tres i Raiuns soziai de referimënt.
Garantí mosöres de sostëgn por mantigní i posć de laur
“L’obietif dles mosöres economiches che i presentun incö é chël da garantí l’esistënza dles impreses südtirolejes y insciö posc de laur”, á sotligné l’assessur por l’economia Philipp Achammer tratan la conferënza stampa olache al á presenté les mosöres por l’economia y les impreses. “I orun insciö daidé les impreses atocades dala crisa dla pandemia che ne é nia bugn da superé la crisa da susc. Un di criters por damané i aiüc sará chël da mantigní i posć de laur.”
Sostëgn por paié i cosć fisc
L’assessur por le turism Arnold Schuler á spo presenté la mosöra de sostëgn ai cosć fisc dles impreses. “Alado de nosc arat sarál tröpes impreses tl setur dl turism che podará fá domanda ince por les gran pordüdes finanziares te chësc setur por n valur de 2,5 miliarg de euro”, á dit Schuler.
Sospenjiun de cutes
Le presidënt Kompatscher á spo ince splighé le funzionamënt dl Fond PMI, l’acordanza confermada cun les banches locales cun chëra che an pó damané imprësc y condiziuns alisirades dal fonds de rotaziun cun la novité de pici imprësć cina 30.000 euro por garantí licuidité. I Comuns á tut la dezijiun da sospëne les cutes y i paiamënc comunai.
Dötes les informaziuns pon ciafé sön la plata internet AiücCovid.
USP/jw/sf
Galaria dales fotografies
