Atualità
Caserma Tempesti a Corvara:La Provinzia fej sö abitaziuns por i soldas
Tl areal dla Caserma “Tempesti” a Corvara fej sö la Provinzia abitaziuns por colaboradus dl esert y sü sorvisc. Surapost dl assessur competënt Bessone.
Na frabica nöia sciöche residënza di colaboradus dl esert, la sënta dl Comando y n frabicat de sorvisc gnará fac sö dala Provinzia de Balsan sön l’areal militar "Tempesti" a Corvara, che á la funziun de zënter logistich y d’adestramënt dles trupes alpines. I laurs fej pert di intervënc preodüs dal’acordanza danter la Provinzia y le Ministêr dla Defenüda, stlüta jö de setëmber dl 2015 sciöche mudaziun dl’acordanza de program originara dl 2007. Te chësta acordanza él preodü che deplü areai militars lasciá sö, sura döt le Südtirol, passes ala Provinzia, deperpo che la Provinzia surantol da fá sö abitaziuns nöies por colaboradus dl esert y da ressané strotöres abitatives y de tëmp lëde por i soldas. I laurs, che porta a n investimënt de plü co 5 miliuns de euro, dess gní dá ia bele anter aurí de chësc ann.
Abitaziuns, sënta dl Comando y sorvisc
L’assessur por le frabiché y le patrimone Massimo Bessone á vijité dan da püch adöm al general Claudio Berto, comandat dles Trupes alpines, la Caserma Tempesti a Corvara, ince conesciüda scöche “Villaggio Alpino Tempesti”. L’assessur Bessone á sotligné por l’ocajiun: “Sciöche barat di laurs che i fajun por le Ministêr dla Defenüda ciafunse areai militars lasciá sö che i surandun spo ai Comuns por la realisaziun de abitaziuns o de arees por le tëmp lëde por i zitadins y les families."
Le program aprové prevëiga la realisaziun de trëi frabiches. Öna na frabica cun 52 posć da dormí cun abitaziuns por i militars, n'atra frabica cun daite sorvisc sciöche le salf por i pasć cun 92 posć a desposiziun y locai por lavé le guant. Implü él preodü na frabica por la sënta dl Comando cun indöt nü postaziuns de laur. La cubatöra che gnará realisada sará de 11.200 metri cubic. I laurs dess mët man de setëmber dl 2021. Al é preodü che ai dess doré cina dezëmber dl 2022. Implü él bele gnü realisé da pert dla Provinzia döes frabiches cun 200 posć da dormí cun n investimënt de 4 miliuns de euro.
USP/sa
Galaria dales fotografies
