Atualità
Trasport scolastich: De plü corieres por deplü segurëza
Dai7 de jená sarál a desposiziun 180 corieres ajuntives por i scolars. L'assessur Alfreider: "I orars dles corieres sará ma online sön la plata internet y app".
Corieres ajuntives garantirá plü segurëza tl trasport scolastich dai 7 de jená inant. Le Departimënt Infrastrotöres y Mobilité, la Repartiziun Mobilité y les Intendënzes scolastiches dla Provinzia á lauré adöm cun les scores y le Comissariat dl Govern a Balsan por cherié na basa por n sorvisc de trasport scolastich sigü y efiziënt. Al gnará metü a desposiziun 180 corieres implü, por zirca 380 iadi implü al de.
I laurs de preparaziun al mëte man dla scora do les vacanzes y le potenziamënt dl trasport scolastich é incö (5 de jená) gnüs presentá dai assessurs Daniel Alfreider, Philipp Achammer y Giuliano Vettorato
Leziuns en presënza: planificaziun avisa por potenzié les linies
L'assessur provinzial por la mobilité Daniel Alfreider á splighé: "Nosc obietif é chël da sostigní le plü che ara vá les leziuns en presënza te düc i liví scolastics, ince tla perioda dl coronavirus, conscidran tresfora la situaziun epidemiologica por garantí la sconanza plü alta dla sanité. Adöm cun la Repartiziun mobilité y i conzescionars, á 10 tecnics lauré por deplü edemes en contat cun les scores por adaté le miú che ara jiss le sorvisc de trasport ai bojëgns dles scores”.
Aladô de Alfreider é ince fondamentala la colaboraziun dles scorares y di scolars. “Al é dër important che i passajiers se partësces sö plü che ara vá sön dötes les corieres a desposiziun che se möi söla medema linia, porchël é chiló damanada la colaboraziun dles scolares y di scolars. De aiüt por podëi sfruté damí les capazités dl trasport publich é ince sce les scolares y i scolars tol düc vigni de le medemo bus.”, dij Alfreider. Porchël gnará les corieres aposta ince segnalades y numerades cun na “S” o cun la scrita “Trasport scolastich”.
“suedtirolmubilta.info“: dötes les informaziun sön la app o söla plata internet
I orars dles corieres scolastiches gnará ma publicá söla app o te internet. Te internet é i orars da ciafé sot a www.suedtirolmubilta.info. Les corieres scolastiches é segnalades cun na “S”. L’app suedtirolmubilta pó gní desciariada dal Google Play Store y dal App Store. Ince dailó gnará publicá düc i iadi dles corieres.
Les regoles de segurëza vel inant
Por la proteziun cuntra le coronavirus restel en forza regoles frëmes de sigurté, sides canche an aspeta la coriera, co tratan le iade y dedô: al é d'oblianza da se vistí tres na maschera che cür la bocia y le nes. “Al é important da mantigní les destanzes y da ne baié nia dër da d'alt por archité la defujiun dl risch de infeziun. Cun le mëteman de jená él preodü deplü controi” á dit le diretur dla Repartiziun mobilité Martin Vallazza. Les porsones che controlëia podará ince fá straufunghes sce valgügn ne se tëgn nia ales normes de proteziun. Tles staziuns y architades plü importantes gnarál istalé n Sorvisc de por i passajiers.
Adatamënc eventuai do le mëte man dla scora
Le diretur de Repartiziun Vallazza á sotrissé che “ince sce tröc coliamënc funzionëia bele bun y ince sce al é gnü tut dötes les mosöres de preparaziun, podarál gní a se le dé dai 7 de jená inant situaziuns nia programades.” Te chësc caje sarál i ofizi competënc che ciarará da ciafé atira soluziuns locales adatades.
USP/rc/san/sf
Galaria dales fotografies
