Atualità
Val Badia: Intervënt de prescia rové, strada daverta dales 18 inant
La strada statala dla Val Badia gnará daurida dales 18 por le trafich te entrames les direziuns. Do l’intervënt de prescia é la segurëza stradala indô garantida.
Le Sorvisc Strades dla Provinzia y les impreses interessades á stlüt jö l’intervënt de prescia sön la strada statala dla Val Badia danter Mantëna todëscia y Longega. La strada gnará daurida al trafich dales 18:00 inant. Do le maltëmp á la strada messü gní sarada en domënia (ai 6 de dezëmber) porvia de material che é rové sön strada y cun la mancianza de stabilité de n parëi sön strada che é sëgn gnü stabilisé.
L’assessur por la mobilité Daniel Alfreider sotlignëia: “I laurs é gnüs fac tres n intervënt de prescia. Sides le Sorvisc Strades co ince les impreses interessades á porté inant i laurs te na manira asvelta por mëte en sigurté le toch de strada.” Ince por la metüda en sigurté de n toch atira dlungia él la Junta che á bele aprové de setëmber n intervënt ajuntif, che gnará completé dala Repartiziun Infrastrotöres da d’aisciöda, insciö Alfreider.
Le diretur dl Sorvisc Strades dla Provinzia, Philipp Sicher dij che la strada é stada sarada por le trafich, mo daverta por intervënc de pröm aiüt y de nezescité. “Por caji de emergënza ê la strada daverta”, insciö Sicher.
L’assessur Alfreider á sotligné la buna colaboraziun danter le Sorvisc Strades, la Repartiziun Infrastrotöres, les impreses y i Comuns de San Laurënz y de Mareo. “La segurëza é la priorité plü alta. I savun dla problematiches che la stlüta dla strada porta por i zitadins y i un programé laurs sides de nezescité co ince de sistemaziun di toc danejá”, insciö Alfreider.
USP/rc/san
Galaria dales fotografies
