Atualità
Entrada nöia dla Val Badia: Esplojiun finala por le tunel nü
Inier (22 de otober) él gnü a se le dé l’esplojiun finala por la perforaziun dl tunel dl’entrada nöia dla Val Badia.
N obietif important por la costruziun dl tunel che fej pert dl’entrada nöia dla Val Badia tl Comun de San Laurënz é gnü arjunt inier en jöbia ai 22 de otober. En presënza dl assessur por les infrastrotöres y la mobilité Daniel Alfreider y l’ombolt Martin Ausserdorfer él gnü fat l’esplojiun finala por la perforaziun dl tunel nü. Conscidran la geologia complicada dles parëis y la stlüda di cantiers por dui mëisc porvia dl’emergënza sanitara él impó sté meso da porté a piz la perforaziun por la fin de otober. Ala esplojiun finala él stá presënc inier da sëra ince n valgügn rapresentanc dles dites STRABAG, ALPENBAU, Moser & CO, Unionbau y GEOBAU. Le diretur di laurs Georg Fischnaller á rengrazié por l'ocajiun düc chi che á daidé para por arjune chësc obietif.
Entrada nöia fej pert dl conzet dla mobilité
L’entrada nöia dla Val Badia é un di proiec prinzipai tl setur di laurs publics de döta la Provinzia. Ara ne sará nia ma d’ütl por la fraziun de Flaurënz y dl paisc de San Laurënz, mo ara garantësc n coliamënt diret danter la strada dla Val Badia cun la strada de Puster zënza incrujades. L’assessur Alfreider sotlignëia che chësta infrastrotöra é n pilaster important por le conzet dla mobilité de döt Puster: “En combinaziun cun l’ampliamënt dla linia dla ferata y di trus dla roda é le smendrimënt dles codes sön strada nosc obietif prinzipal por la Val de Puster y l’entrada dla Val Badia.” Porvia dla buna colaboraziun cun les dites y le comun él sté meso da jí inant bun cun i laurs ince ponsan che tl 2019 él sté le maltëmp y tl 2020 l’emergënza sanitara, dij l’assessur. “A vigni moda él gnü lauré tres cun l’obietif da ciafé soluziuns y insciö sun stá bugn da desgropé tröpes situaziuns complicades”, dij Alfreider.
Le proscim vare é l'istalaziun dl punt
La contlujiun di laurs é preodüda aladô dl responsabl di laurs Umberto Simone por Nadé 2021. Do la perforaziun dl tunel él sëgn sön le program l’istalaziun dl punt sura le lech artifizial y la linia dla ferata. L’entrada nöia dla Val Badia pëia ia cun le tunel a Pflaurënz lunch 400 metri y che vá spo inant cun n punt de 140 metri sura le lech che condüj a n rondel che fajará da coliamënt cun la strada prinzipala de Puster.
Imajes video y file audio
Imajes esplojiun: https://we.tl/t-1njdTFHaVZ
Imajes drone: https://we.tl/t-7CFdkX5Gsu
Imajes esplojiun: https://we.tl/t-Md9MrluB3N
Intervista Daniel Alfreider (ladin)
Intervista Andreas Pichler (todësch y talian)
USP/USP
