Atualità
Pachet dla cultura, 480 domandes presentades da artistes y artisć
Al é indöt 480 les artistes y i artisć de düc trëi i grups linguistics che á presenté les domandes por ciafé i 2000 euro preodüs sciöche sovenziun por l’emergënza Coronavirus.
Porvia che les restriziuns atuades por archité la defujiun dl coronavirus á atoché cotan da merz inant le setur cultural dla Provinzia á la Junta provinziala aprové dui pachec de mosöres de sostëgn por artistes y artisć sön proposta di assessurs Daniel Alfreider, Philipp Achammer y Giuliano Vettorato. Le secundo pachet á albü sciöche termo por dé jö les domandes ai 29 de setëmber por ciafé na sovenziun de cina 2.000 euro. “Le setur dla cultura á dötaurela ciamó dificoltés da messëi afronté y cun chësta mosöra él sté nosta ghiranza da ti dé n impuls por le monn cultural che savun ester important por döta la sozieté”, dij l’assessur por la cultura ladina Daniel Alfreider. “I sun ince contënc che al é gnü presenté 39 domandes da pert dl grup linguistich ladin che fej fora le 8,1 porcënt dles domandes presentades indöt tl Südtirol”, insciö Alfreider.
Indöt él gnü presenté 480 domandes, 39 de chëstes (8,1 porcënt) pro la Intendënza y Cultura ladina, 322 (67,1%) pro le Departimënt Scora y Cultura todëscia y 119 (24,8 porcënt) pro le Departimënt Scora y Cultura taliana. Indöt 130 domandes é gnüdes elaborades dai ofizi y 80 artisć á bele ciafé la sovenziun. 47 ciafará le contribut ti proscimi dis. Indöt él gnü paié fora cina sëgn 160.000 euro, implü gnará 94.000 euro paiá fora tosc.
Al á podü fá domanda artisć profescionisć lëdi zënza contrat de laur dependënt sura 12 ores al’edema y che é atifs te Südtirol da almanco dui agn. L’ativité artistica de almanco dui agn mëssâ gní documentada tres la presentaziun de n curriculum vitae. Artisć profescionisć lëdi cun contrat de laur dependënt sura 12 ores al’edema o artisć en ponsiun y studënc/ studëntes ê stlüc fora.
Dlungia al sostëgn finanziar á la Provinzia ince dé n segnal de reconoscimënt de döt le setur dla cultura. Cina de novëmber dl 2020 ará i artisć la poscibilité da ester presënc sön de plü plataformes de organisaziuns desvalies sciöche la Lia mostra d’ert da Urtijëi, le proiet cultural SMACH, la Lia Autores Südtirol o organisaziuns sciöche Vereinigte Bühnen Bozen, Teatro Stabile di Bolzano, Fondazione Haydn Stiftung, Euregio Kulturzentrum Gustav Mahler, BASIS Vinschgau Venosta, ASTRA – Zentrum für junge Kultur, Kunsthalle West, Ost West Club Est Ovest y tröc d’atri.
USP/jw/fgo
