Atualità

Junta regionala: sostëgn al Istitut Cultural “Cesa de Jan”

La Junta regionala á deliberé le sostëgn finanziar de indöt 80.000 euro a bëgn dl Istitut Cultural Ladin “Cesa de Jan” de Col Santa Lizia.

L'aprovaziun dl sostëgn finanziar de 80.000 euro por l'ativité istituzionala por l'ann 2020 dl Istitut Cultural Ladin “Cesa de Jan” cun sënta a Col Santa Lizia é stada sön l'ordinn dl de dla videoconferënza dla Junta regionala de ai 17 de aurí.

La delibera é gnüda presentada dal assessur Giorgio Leonardi competënt l'integraziun europeica sön la basa dla lege 3/2018, adöm al assessur por les mendranzes Manfred Vallazza, che reverda la tematica, “Normes en materia de sconanza y promoziun dles mendranzes linguistiches zimbra, mochena y ladina dla Regiun Autonoma Trentin-Südtirol”. 

"Cun l'aprovaziun dl sostëgn finanziar él poscibl da sostigní l'ativité de gran valüta dla Cesa de Jan che se crüzia da mantigní y promöie le lingaz y la cultura de nosta mendranza ladina", spliga Vallazza.

La lege prevëiga la promoziun dla colaboraziun sura i confins fora y chëra danter i Comuns che á n lian storich y linguistich, sciöche por ejëmpl i Comuns ladins de Col Santa Lizia, de Fodom y de Ampëz. Implü vëgnel ince sostigní tres l'adejiun a assoziaziuns y organisaziuns che se fistidëia de tematiches che reverda la sconanza y la promoziun di grups linguistics y di lingac de mendranza.

L'Istitut cultural ladin “Cesa de Jan” é atif tl setur dla cultura y en particolar tla promoziun dla sconanza y valorisaziun dl identité culturala y linguistica ladina dla popolaziun ladina dles Dolomites ti Comuns de Col Santa Lizia, Fodom y Ampëz che fej pert dla Regiun dl Veneto, mo che storicamënter á n lian dër sterch cun le Tirol. L Istitut se crüzia ince dl stüde scientifich dl lingaz, dla storia y dla cultura di ladins dles Dolomites, dl sostëgn al adoranza dl ladin tla forma scrita y orala en colaboraziun cun les aministraziuns publiches y scores, dla sconanza dla cultura ladina y dl potenziamënt de mosöres che reverda la promoziun y le svilup dl lingaz ladin tres i mass media, dla defujiun de publicaziuns y inrescides, dla racoiüda de material storich, dl'economia y dles usanzes ladines. Implü él ince n so compit la promoziun de manifestaziuns publiches de interes turistisch-cultural y storich-cultural.

 

 

USP/fg/rc